Educación patriótica énte a valores cívicos

La promulgación de distintes lleis educatives, 8 lleis distintes en cuarenta años, amenó siempre polémica nel aspeutu referíu a cómo treslladar al alumnáu una formación basada nel respetu a los valores democráticos, constitucionales y los derechos humanos.  Aportunóse milenta vegaes en que la educación nun debería de convertise nun campu de disputes partidistes pero, magar de los bonos deseos, la derecha política llanzó campañes  contra la implantación d’asignatures como Educación pa la Ciudadanía y los Derechos Humanos, a la qu’acusaba d’adoctrinamientu.

Más alló del discutiniu, queda la sensación de que l’alderique sobre cómo formar mentes crítiques, capaces d’analizar la realidá social, sensibles a los problemes más ingrientes como’l cambéu climáticu, la igualdá de xéneru, el respetu a la diversidá, etc. queda ensin cerrar. La derecha, surdida d’una reforma del franquismu, siempres vio con muncha rocea  esti asuntu.

Atopamos estos díes con una iniciativa que parte d’un Colexu Públicu d’Uviéu que plantega como actividá l’izáu  de la bandera española por cuenta de la celebración del Día de la Hispanidá que foi asumida como propia per parte de la conceyalía d’Educación del Conceyu.  Dende SUATEA, cuéstanos entender cuálos son los oxetivos d’esta actividá ya intentar casala col conxuntu de valores cívico-democráticos que tien de recibir l’alumnáu. Creemos necesario dar  en una reflexón sobre la propuesta. En dellos medios, l’añu pasáu, tratóse l’izaú de bandera como una actividá festiva con calter patrióticu. Si l’oxetivu d’estos actos ye una reconocencia a l’actividá llaboral desenvuelta dende les Fuerces Armaes, preguntamos por qué tenemos que faer una reconocencia especial a una actividá llaboral y non al restu, porque toes son igual de dignes: les muyeres d’ayuda en casa, los bomberos forestales, el personal sanitariu o inclusive la mesma actividá docente. Toos estos trabayos son actividaes llaborales dignes d’una reconocencia que nun ufierta nenguna dulda a nivel social, por eso preguntamos cuál ye l’interés esistente pa realizar una actividá qu’inclúi una reconocencia frente al alumnáu d’una actividá que puede venceyase al espardimientu de valores xerárquicos, militaristes o disciplinarios.

Si l’oxetivu  la celebración fuere impulsar l’hermanamiento colos pueblos hermanos d’América Llatina, nun entendemos por qué habría que festexar una bandera y non de toes y caúna de les repúbliques hermanes, más allá de les connotaciones de calter neocolonial que puede despidir l’actu en sí mesmu.

Sía como fora, dende SUATEA nun acabamos de ver  a cuentu de qué tenemos de celebrar el  Día de la Hispanidá y menos con un actu militar na escuela.  Cuarenta años dempués, siguimos teniendo problemes pa xenerar unos valores constitucionalistes nos que s’integre tola sociedá. El día que resolvamos esta cuestión daríamos un pasu en condiciones hacia un patriotismu cargáu de valores como’l respetu a la igualdá, diversidá o la mentalidá crítica, valores toos ellos universales.

                                                                                                                             Uviéu 11 d’ochobre 2022