Esta entrada está disponible en: Castellano (Castellanu)
Entamó’l cursu y 38 alumnos del total de los tres grupos d’Educación Infantil (EI) del Colexu Públicu de Morea (Ayer) nun recibirán enseñances de Llingua Asturiana. Suponen el 88, 8 per cientu del alumnáu d’esta Etapa y los sos padres escoyeron voluntariamente (derechu recoyíu nel artículu 4 del Estatutu d’Autonomía d’Asturies y l’artículu 10 de la Llei d’Usu) recibir clases con esi conteníu.
La Conseyería d’Educación solo dotó a esta escuela con una maestra d’Asturianu a media xornada, magar que la dirección del centru y los padres y madres yá lleven reclamando dende últimos del cursu pasáu, la necesidá d’una profesora a tiempu completu p’atender les necesidaes del aria na escuela.
El casu resulta enforma sangrante: l’alumnáu d’EI de 4 y 5 años d’anguaño llevaba recibieno clas d’Asturianu dende qu’anició la so escolarización hai dos años y ve cómo agora s’interrumpe arbitrariamente.
D’otru llau, Escueles de Xixón y Uviéu tán negando tamién estes enseñances a rapacinos y rapacines de 3 años qu’entamen la so escolarización y ello magar a la voluntá de recibiles espresada polos sos padres y madres nel procesu matriculación.
Nes instrucciones d’aniciu d’esti cursu 2018/19 recuéyese nes primeres páxines del documentu y per primera vez depués de los venti años en vigor de la Llei d’Usu, un oxetivu institucional acordies al so conteníu: “Promocionar la lengua asturiana y su uso en el sistema educativo, garantizando su enseñanza en todos los niveles y grados”.
Anguaño, acabanda prácticamente yá la llexislatura, solo poco más de cuarenta centros ufierten conteníos d’Asturianu na EI, lo que sumao a estos casos, amuesa la falta de rigor y compromisu de la Conseyería d’Educación cola enseñanza del Asturianu y rescampla la necesidá de siguir esixendo:
¡ASTURIANU Y GALLEGO-ASTURIANU N’EDUCACIÓN INFANTIL YÁ!
Uviéu, 12 setiembre de 2018.
El secretariáu de SUATEA.
Esta entrada está disponible en: Castellano (Castellanu)