Home > Comunicaos > Educación inclusiva, o l’arte l’engañu

Educación inclusiva, o l’arte l’engañu

La educación o ye inclusiva o ye illegal desque la LOE, Llei Orgánica 2/2006, de 3 de mayu, d’Educación introduxera’l conceutu d’inclusión ente los sos principios y fines. Nenguna llei posterior lu esanició, pero tampoco lu sofitó cola inversión presupuestaria afayadiza. Nos postreros 14 años, les alministraciones educatives perfeccionaron l’arte l’engañu, llexislando sobro la inclusión en diversos decretos, instrucciones, circulares y, inclusive, na formación del profesoráu. Cenahories pa crear la ilusión d’equidá y caltener la esperanza, especialmente ente les unidaes, departamentos y equipos d’orientación.

Estes y estos profesionales “basa y garantes de la equidá nos centros educativos”, tal que se definen nes Instrucciones de la Dirección Xeneral d’Ordenación, Evaluación y Equidáeducativa pa los Servicios Especializaos d’Orientación educativa (SEO), echen de menos munchos recursos que son imprescindibles pa poder caltenela y garantizala.

Dende SUATEA vemos necesario reseñar eses novedaes-falcatrúes más recientes nel ámbitu de l’atención a la diversidá del nuesu alumnáu y amosar les nueses permanentes reivindicaciones énte una situación poco cambiante:

●   Nes instrucciones pa los SEO del cursu 2020-2021, citaes nel párrafu anterior, desapaeció la referencia a los apoyos intensivos d’hasta 10 hores selmanales p’alumnáu con trestornu grave de conducta, discapacidá por autismu, discapacidá motora o auditiva. Desque la Circular d’Entamu de cursu 2018-19 amenorgara a 5 les hores selmanales d’atención individual de PT y AL, esos sofitos suponen la única midida efectiva d’atención especializada, teniendo en cuenta les mermaes plantiyes de los centros. Cola desapaición de la referencia a esti tipu d’apoyos nes instrucciones pa los SEO peligra gravemente la so aplicación al alumnado más necesitáu. Dende SUATEA esiximos el caltenimientu de los sofitos intensivos ya individualizaos pol tiempu selmanal que sía necesario.

●   Esa paez la posibilidá de que les unidaes y departamentos d’orientación de cada centru puedan dar d’alta de necesidaes educatives especiales al alumnáu que lo necesite en cualquier momentu del añu escolar y la de solicitar l’asignación de los recursos necesarios de manera inmediata, en sin necesidá d’esperar al cursu siguiente. Esta midida, qu’aceleraba y ampliaba, poro, ameyoraba l’atención a la diversidá, tuvo una perbreve vixencia: 1 de setiembre de 2019 al 22 de mayu de 2020. Dende SUATEA esiximos la recuperación d’esa competencia pa los SEO.

●  Al alumnáu mándenlo onde tán los recursos y non al aviesu. Nun se dota de recursos al centru que-y correspuende por zona, o al que prioriza ente la ufierta esistente. Esto ye una constante nel casu de les nueves escolarizaciones que riquen, por casu, auxiliares educatives, fisioterapia y mediación comunicativa. L’atención especializada sigue concentrándose en determinaos centros anque la etiqueta d’”atención preferente” sumiera p’aparentar mayor inclusión. Dende SUATEA demandamos que se dote de recursos a los centros onde s’escolarice l’alumnáu.

●   Nun son asgaya les Aules Abiertes p’alumnáu con autismu.Poro, les nueves escolarizaciones caltener na incertidume de nun saber a qué tipu de centru van a llegar nin con qué sofitos: ¿ordinariu en sin sofitu intensivu especializáu? ¿Centru d’Educación Especial? (más baratu). Dende SUATEA demandamos la dotación de nueves Aules Abiertes.

●  Recuérdase, por si escaeciéramos la circular de 12 de febreru de 2014, que l’alumnáu d’ESO va poder disponer de sofitu d’Audición y Llinguaxe n’ESO cuando presente discapacidá auditiva, disartria o TEA. Dende SUATEA demandamos l’atención AL a tol alumnáu que lo necesite.

●  En Bachilleratu y ciclos formativos de formación profesional l’alumnáu con NEE nun va disponer, polo xeneral, de profesoráu de sofitu de PT, nin d’AL.Namá nel casu del alumnáu con discapacidá auditiva l’equipu Rexonal valorará ya informará sobro la necesidá de sofitu especializáu d’AL, o mediación comunicativa. Dende SUATEA demandamos l’atención PT  y AL a tol alumnáu que lo necesite.

●   Nos centros d’educación especial l’alumnáu d’infantil y d’Educación Básica Obligatoria va tener prioridá pa recibir sofitu d’AL y de fisioterapia. L’alumnáu de transición a la vida adulta va poder recibir esos recursos solo cuando esista disponibilidá horaria nel centru. Dende SUATEA demandamos l’atención AL y fisioterapia a tol alumnáu que lo necesite.

●   Les plantiyes orgániques de los centros presenten un grave déficit de profesoráu especialista en PT y AL colqu’encarar de forma efectiva toles necesidaes que se detecten. Hai un enclín a l’alza d’atender les necesidaes con profesoráu interín (plantiya variable de necesidaes) que tiende a minorase al faer cada vez más restrictivos los criterios de valoración del alumnáu para recibir sofitu educativu. Dende SUATEA demandamos el respetu a los Alcuerdos de plantiyes y dotar a los centros con personal especializao en función del total d’alumnáu qu’escolaricen y non solo en función del alumnáu con informe sicopedagóxicu.

Per otru llau, reseñar que la Inclusión ensin inversión nun esiste. Caltiense una Equidá ya Inclusión aceptables a costa del compromisu y el trabayu del personal docente, que se ve frustrao por nun poder dar una óptima respuesta educativa a les necesidaes del alumnáu.

P’acabar ye necesario mentar la situación escepcional creada pola pandemia. La declaración del Estáu d’Alarma obligó a la educación telemática de tol alumnáu. L’alumnáu con necesidaes educatives especiales o de sofitu, vio nesti tiempu como la so atención educativa de deterioró condicionada poles circunstancies. L’atención individualizada con un tiempu especial a cada discente, con ayudes nel momentu precisu, col axuste de tolos parámetros necesarios pa la comprensión y pa la espresión efectivo y funcional, nun foi posible. Sabíemos con anterioridá que la enseñanza esixía la comunicación presencial y el contactu social real, pero esta esperiencia enseñómos que son imprescindibles pa l’atención qu’ufierten los perfiles de PT y AL.

Poro, si dende les alministraciones educatives proclames d’Inclusión y Equidá formen parte de los sos principios d’actuación, ye imprescindible atender a esti vulnerable y desfavorecíu alumnáu el próximu cursu con crecientes recursos humanos y materiales.

El Secretariáu de SUATEA

N’Uviéu a 2 de xunetu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344