Dos meses dempués de la fuelga, recibiónos la Conseyera Educación

Esta entrada está disponible en: Castellano (Castellanu)

Güei vienres, 4 de xunu, dos meses dempués de la fuelga de profesoráu interino, la Sra. Conseyera d’Educación, Carmen Suárez, axuntóse con una representación de les organizaciones sindicales que llamemos al paru del 14 d’abril para pidir l’aplazamientu de les oposiciones previstes para esti mes de xunu y la negociación d’un nuevu Alcuerdu d’Interinidá n’Asturies.

A dos selmanes del entamu del procesu selectivu, dende SUATEA volvimos aportunar na conveniencia d’un aplazamientu que dexe al profesoráu, obligáu a participar, preparar  les pruebes en meyores condiciones, pa poder competir n’igualdá de condiciones.

En confirmando, una vegada más, que nun va haber aplazamientu, xusto’l día dempués de que los tribunales canarios almitieron que van valorar la suspensión cautelar de les oposiciones 2021 y magar les duldes que xenera’l Protocolu de Seguridá frente a la Covid, SUATEA propunxo, como solución alternativa, esaniciar la obligatoriedá de tener que presentase a los exames para permanecer nes llistes, como regula l’actual Alcuerdu d’Interinidá, cola condición d’actualizar el baremu y poder  incluyir otra nota d’oposición. Énte esta propuesta, l’Alministración nun dio una respuesta concluyente, anque adelantró que’l plazu pa introducir esti tipu de cambeos ye bien curtiu. D’ende la nuesa insistencia na necesidá de que nos recibiere aína. Sicasí, en SUATEA tamos convencíos de que ye una cuestión de voluntá política, y que podríen establecer les midíes propuestes con calter d’urxencia, y de forma escepcional, nun  cursu nel que la singularidá tuvo a la orde del día.

Otru asuntu qu’encetamos foi’l referíu a la vacunación del profesoráu. Como ye bien sabío, ta pendiente de realizase la inoculación de la segunda dosis. Dende la Conseyería confirmáronnos que’l SESPA va dar en camudar les feches, adelantrando les citaciones a les dos primeres selmanes de xunu.

A esto, hai que recordar que mientres se realiza’l procesu, habrá una coincidencia col restu del personal aspirante que nun forma parte del sistema educativu y que, por ello, nun empecipió entá’l so procesu de vacunación. Amás comentomos que les situaciones imprevistes que puedan soceder nel intre de les pruebes van resolvese con “humanidá”, una vegada estudiaes les reclamaciones y xustificaciones pertinentes.

Pa rematar, la Conseyera d’Educación comprometióse a contactar  col restu de OOSS pa esquizar la posibilidá d’encetar la negociación d’un nuevu Alcuerdu d’Interinidá. Nesti sen, dende SUATEA recordámos-y que, como parte firmante, esi yera un pasu que podría dar de forma unillateral la mesma Alministración. Confiamos en que se valoren los argumentos apurríos por SUATEA pa solucionar el grave problema d’inestabilidá que sufre’l profesoráu interino y que vien arrastrándose dende va décades.

El Secretariáu de SUATEA 

N’Uviéu, a 4 de xunu de 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757