Docentes contra les oposiciones: entamen les movilizaciones

Entamen les asamblees y les iniciatives del profesoráu interín contra la convocatoria d’oposiciones anunciada pola Conseyería d’Educación.

Dende’l sindicatu SUATEA propúnxose al profesoráu interín que tome la iniciativa nel so centru y qu’entamara movilizaciones a lo llargo d’esta selmana qu’amosaren el refugu a la exigua convocatoria d’empléu públicu anunciada pola Conseyera d’Educación.

Dellos centros de Mieres, Xixón, La Puela Ayande y Uviéu pasaron a l’acción y celebraron asamblees nes que se manifiesta una atayante oposición a la propuesta de la Conseyería. En dalgunos d’ellos celebráronse concentraciones y tamién se secundaron iniciatives como les del colectivu d’interinos ADIA consistentes na recoyida de firmes p’apurrir a l’alministración.

Les razones pa esta unánime respuesta yá fueron abondamente espuestes:

• La incertidume que nos asitia a finales del mes de xineru ensin saber lo que va asoceder o a qué especialidaes va afectar.
• L’efectu llamada al nun esistir convocatories nes CCAA cercanes y que va atraer a miles d’opositores de toes partes.
•  La falacia que supon facer creer qu’una convocatoria de 14 places va sirvir pa estabilizar una plantiya de profesoráu que tien casi una cuarta parte de docentes en condiciones de vulnerabilidá al tener contratos d’interinidá.
• La esmolición que xenera’l financiamientu d’un procesu selectivu cuando se tán retayando’l númberu de contratos que se realicen cada añu.

En definitiva dende SUATEA cuntamos con que los próximos díes sigan sumándose más centros y llogremos evitar la sinrazón que entrañan estes oposiciones que perxudiquen al colectivu más castigáu polos retayos na educación pública. Tanto’l funcionamientu de los centros como la mesma calidá de la enseñanza tán en xuegu.

Uviéu, 22 de xineru de 2014