Home > Comunicaos > Discriminación y incomodidaes pal profesoráu en práctiques de la fastera rural

Discriminación y incomodidaes pal profesoráu en práctiques de la fastera rural

El próximu mes de febreru entamen los cursos de formación pal profesoráu en práctiques qu’afeuten obligatoriamente a quien aprobaron les oposiciones del branu de 2019.

L’empiezu d’estos cursos vien xenerando malestar ente’l profesoráu afectáu poles condiciones nes que se realiza esta formación. Tamos falando d’un cursu que ye obligatoriu pa poder consolidar la condición de funcionariu o funcionaria.

Como asocedió n’años anteriores, la programación de les sesiones de formación va implicar una riestra d’importantes incomodidaes pal personal convocáu pa participar nella.  El zarru de los Centros de Formación del Profesoráu (CPR) de les ales, coincidiendo cola dómina dura de los retayos, obliga al profesoráu a facer importantes desplazamientos kilométricos en percorríos de dir y volver, n’horarios de tarde, qu’amplíen na práctica la so xornada llaboral hasta altes hores de la nueche. Too ello ensin entrar a valorar les posibles inclemencies meteorolóxiques, abondoses pel hibiernu.

Tamos falando d’un cursu que consta de seis  sesiones d’unes cuantes hores, amás de la sesión inaugural, que se desendolquen en distintes localidaes. Esto significa, pa quien tienen destín nes localidaes más alloñaes, un condicionamientu de los horarios de mañana porque hai qu’axustar la salida de los centros y l’actividá de pela tarde. Toos estos desplazamientos, obligatorios, cuerren al cargu del profesoráu porque la Conseyería nun los considera itinerancies nin, polo tanto,  los paga.

Aprovechando la coincidencia de xuntes de grupos de trabayu ente l’Alministración y los sindicatos, denunciemos una vegada más  esti problema énte responsables de la Conseyería. La respuesta llograda, “voi tresmitir” ye claramente insatisfactoria y llamentable.

Dende SUATEA venimos reivindicando la reapertura de los CPR de les ales y asina lo manifestemos dende’l so zarru y ye una propuesta que forma parte tanto del nuesu programa eleutoral como de les reivindicaciones presentaes a la Conseyera al entamu d’esti cursu.

Énte la imposibilidá de qu’estos cambeos puean aplicase esti cursu, creemos qu’hai que buscar soluciones transitories, urxentes, que dexen amenorgar l’impactu del cursu de formación ente’l personal docente afectao. Por ello pensamos que l’Alministración tendría d’ampliar el númberu de sesiones de formación de manera que pudieren impartise los cursos nes zones onde enantes esistieron CPR, xustamente les zones perifériques, más alloñaes del centru d’Asturies que son les qu’obliguen a llargos desplazamientos en kilómetros y en tiempu.

El Secretariáu de SUATEA

N’Uviéu a 21 de xineru de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344