Home > Asturianu > Discriminación, represión y humildación a la Conseyera

Discriminación, represión y humildación a la Conseyera

Dende SUATEA denunciamos la discriminación, represión y humildación a la que sometió la presidencia de la Comisión parlamentaria de Cultura, Política Llingüística y Turismu a la Conseyera Berta Piñán al recomendar que nun siguiere emplegando l’asturianu y usare’l castellán énte la protesta de representantes de Vox y PP qu’alegaron  nun entender aquella llingua. La presidencia tomó esta decisión depués de consultar a los servicios Xurídicos de la Xunta y la Conseyera accedió al so pidimientu amosando claramente la so disconformidá calificándola de”humillante”.

Los servicios xurídicos tomaron esta decisión ensin tener en cuenta la normativa asturiana que protexe y avala a la Conseyera nel so derechu al usu del asturianu. La Llei d’Usu: “tolos ciudadanos tienen derechu a emplegar el bable/asturianu y espresase nelli, de palabra y por escrito”. Y el cargu de Conseyera nun-y torga ser ciudadana colos mesmos derechos que tola vulgar ciudadanía asturiano. L’Estatutu d’Autonomía d’Asturies recueye que l’asturianu gozará de protección y promoveráse’l so usu y difusión. El Reglamentu de la Cámara reconoz el derechu de los diputaos a emplegar l’asturianu y nun regula l’usu de nenguna otra llingua por parte d’otres persones nin el derechu a alegar por falta de comprensión de una llingua non oficial.

La decisión de la mesa y la Presidenta torgando l’usu del asturianu a una integrante del Gobiernu asturianu nuna comparecencia parlamentaria fai rescamplar y amplifica los efectos del grave defeutu democráticu que supón la segregación llingüística a la que mos vemos sometíos los ciudadanos y ciudadanes d’Asturies cuando queremos facer efectivos los nuestros derechos llingüisticos.

Depués d’aguantar esta vergoñosa y humildante situación na sede de la representación del pueblu asturianu, nin la ciudadanía qu’emplegamos davezu l’asturianu nin la Conseyera, nin el Gobiernu, nin la mayoría de los nuestros representantes políticos, nin les organizaciones sociales, podemos consentir que’l falsu y feble argumentu de la incomprensión seya emplegáu pa imponer la voluntá de la minoría. Poro, ye menester camudar los reglamentos de la cámara, facer efectivos los derechos recoyíos na Llei d’Usu y reconocer la cooficialidá de la llingua asturiana y el gallego asturianu. Pa esbrozar esi camín la Conseyera pue cuntar col nuesu total apoyu.

N’Uviéu a 2 d’ochobre de 2019

El secretariáu de Suatea.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344