Discriminación recurrente del profesoráu de les nueses llingües

Esta entrada está disponible en: Castellano (Castellanu)

Nel sistema educativu asturianu cuntamos con 343 profesores d’asturianu y gallego-asturianu (100 aproximao a xornada completa) y la mayoría (75%) contratao a media xornada, cuasi too ello profesoráu interino y nuna bona proporcíón itinerante. Hasta equí la situacón de precariedá nel so trabayu nun se separta muncho de la sufrida pol restu de profesoráu interino, nun siendo que l’índiz de contratación temporal cuasi se duplica. 

Sicasí, l’estigma discriminatoriu rescampla cuando mos fixamos na so especialidá docente: nun ta  reconocida en nengún decretu de los que regulen les especialidaes. Consecuencia d’ello: nun esisten nes plantiyes orgániques los puestos que vienen desempeñando dende hai más de 30 años y nun podíen, hasta agora, acceder a la condición de funcionariáu de carrera por estes especialidaes. Tampoco’l funcionariao de carrera con estes especialidaes pue ocupar estos puestos nos concursos de tresllaos al nun figurar nes plantiyes conculcándose asina, en parte, el so derechu a la movilidá nel so puestu de trabayu.

Cola publicación de la “Ley 20/2021, de 28 de diciembre, de medidas urgentes para la reducción de la temporalidad en el empleo público” y la posterior modificación temporal del decretu d’accesu “Real Decreto 270/2022, de 12 de abril, por el que se modifica el Reglamento de ingreso, accesos y adquisición de nuevas especialidades en los cuerpos docentes”, preténdese mermar significativamente la temporalidá nel emplegu p’asina cumplir cola normativa europea, que’l Tribunal Superior de Xusticia de la Unión Europea demanda cumplan les alministraciones españoles reconociendo qu’estes lleven tiempu abusando de la contratación temporal de personal. 

La nueva normativa regula qué places estabilizar (aquelles estructurales ocupaes por personal interino) y cómo acceder a elles. Ye evidente que la mayor parte de les places ocupaes por personal interino de les nuestres llingües son estructurales, pues lleven ocupándose mayoritariamente por personal interino dende hai más de 30 años. Poro, toes elles tienen de ser ufiertaes nos procesos  estraordinarios d’estabilización.  Éstos van ser de dos tipos: un concursu-oposición y un concursu esclusivamente de méritos, abiertos los dos a tol profesoráu. Les persones especialistes nes nuestres llingües puen participar en dambos, pero nun hai seguridá xurídica de si podrán estabilizase na so especialidá al nun tar reconocida llegalmente. De nun poder estabilizase na so especialidá veránse obligaos entós a optar a la estabilización por otra especialidá, pero sufrirán una merma del 50% na  valoración de la so esperiencia docente al nun ser esta esperiencia la acumulada por exercer na mesma especialidá pola qu’opta al puestu trabayu. Esta condición de coincidencia de la esperiencia llaboral previa cola especialidá pola que se presente’l profesoráu p’algamar la máxima valoración introducióse na regulación d’accesu transitoria d’anguaño. Contrasta esta regulación con anteriores onde se valoraba por igual la esperiencia en cualisquier especialidá.

En resume, l’efectu pretendíu por tou esti despliegue llegal y reglamentariu de la merma del emplegu temporal al 8% y la estabilización de les places, que non de les persones abusaes, pue escluyir  les places de les nuestres llingües y marxinar al so profesoráu obligándolo a intentar estabilizase en places onde la so esperiencia  ye minusvalorada. Condergaríase asina a la eterna interinidá-temporalidá a estes especialidaes, contraviniendo lo dispuesto pola llei.

Por si esta discriminación fuere poco amiéstase-y otra más: los certificaos adaptaos al Marcu Européu de les Llingües nos niveles B2 y C1 de competencia llingüista n’asturianu espedíos pola Conseyería educación  conviértense en papel moyao al nun poder  valoralos en condiciones d’igualdá coles certificaciones d’otres llingües del Marcu Européu.

Les pruebes de certificación realícense en dellos institutos d’Enseñanza Secundaria d’Asturies y son les secretaríes d’estos centros les qu’espiden los certificaos de tener superaos los esámenes col preste de la presidencia de la comisión evaluadora. Sicasí, pa poder ser valoraos nes pruebes d’accesu a la docencia (según regula’l Real Decreto 276/2007 de 23 de febrero, por el que se aprueba el Reglamento de ingreso, accesos y adquisición de nuevas especialidades en los cuerpos docentes, nel separtáu- II formación académica- del concursu de méritos) ye menester que la certificación la espida la Conseyería d’Educación, pero col preste de la dirección d’una Escuela Oficial d’Idiomes (EOI): condición que nun cumple’l certificáu d’anguaño. 

Agora tampoco son valoraes estes certificaciones nel separtáu III (otros méritos) al nun tener reconocimientu reglamentariu asturianu pa teneles en cuenta (decreto 62/2001, de 28 de junio, por el que se regulan las actuaciones relativas a formación permanente del profesorado) nos rexistros de formación permanente del profesoráu de la Conseyería Educación.  Consecuencia: nun tienen nengún efectu alministrativu nin n’oposiciones nin concursos de tresllaos nin los efectos económicos correspondientes nel complementu salarial de formación permanente. Y equí sí tien Asturies competencies pal so reconocimientu. Valga como exemplu el País Valencianu onde los certificaos pa la enseñanza en valencianu, el certificáu de Mestre de valenciá o’l C2 de valenciá valórense nel separtáu III, siempre que nun fueren alegaos como requisitu pal accesu,  con 1,75 ó 2 puntos, los dos últimos.

Daqué paecío asocede colos títulos d’Espertu y Especialista en llingua asturiana otorgaos pola  Universidá d’Uviéu. Son dos títulos que, pola so duración, equivaldríen a los actuales títulos de máster y tendríen de ser equiparaos a los niveles avanzaos de competencia llingüística del Marcu Européu de les Llingües.  Estos títulos tampoco son valoraos nel separtáu II (formación académica) de los procesos selectivos. 

Magar que nel últimu congresu de la Federación Socialista Asturiana-PSOE, celebráu’l 18,19 y 20 de marzu de 2022 n’Uviéu, estes organizaciones se definieren como asturianistes, tolos fechos y circunstancies descritos enantes rescamplen el despreciu y la falta de compromisu del Gobiernu asturianu coles nuestres llingües (el gallego-asturianu nin siquier tien regulaes les sos pruebes de certificación). Demuestren tamién la falta de procuru y dilixencia de l’Alministración a la hora de dar seguridá xurídica a les sos actuaciones: nun ye de recibu crear títulos ensin cobertoria reglamentaria que garantice la so valoración. 

En conclusión: el profesoráu d’Asturianu y Gallego-Asturianu vien siendo discriminao, non solo poles sos condiciones llaborales precaries (interinidá, medies xornaes, imposibilidá d’adquirir la condición de funcionariáu de carrera), sinón tamién pola falta reconocimientu de la so formación académica a tolos efectos alministrativos, pola probable  imposibilidá d’estabilización de les sos places y pola obligada minusvaloración de la so esperiencia docente nos procesos estraordinarios d’estabilización llaboral.

Poro, dende SUATEA esiximos a l’Alministración asturiana:

  • La inclusión de les places de les especialidaes Llingua Asturiana y Gallego-Asturianu nes plantiyes orgániques y nos procesos d’estabilización llaboral.
  • La cobertoria normativa afayadiza pa que los títulos de Llingua asturiana daos por ella (Conseyería Educación y Universidá d’Uviéu) seyan valoraos en condiciones d’igualdá colos de les otres llingües. 
  • La valoración na   formación de les llistes de personal interino de los certificaos B2, C1 y títulos d’Espertu y Especialista en llingua asturiana nel separtáu II de formación académica.
  • Les acciones contundentes énte’l Gobiernu Estatal pa que cree o faculte a la alministración asturiana pa crear la especialidá de Llingua Asturiana y Gallego-Asturianu en condiciones d’igualdá coles otres especialidaes llingüístiques.
  • La ufierta obligatoria de la Enseñanza de Llingua Asturiana y Gallego-Asturianu en tolos niveles educativos, incluyíes les Escueles Oficiales d’Idiomes.

El Secretariáu de SUATEA

N’Uviéu a 21 de marzu de 2022

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757