Discriminación del profesoráu de les nueses llingües na valoración de la formación académica

Esta entrada está disponible en: Castellano (Castellanu)

El 7 de marzu d’esti añu 2022 volvió publicase nel BOPA una nueva convocatoria de pruebes de certificación adaptaes al Marcu Européu de les Llingües de la competencia llingüística n’asturianu de los niveles B2 y C1. Van celebrase en setiembre. Depués de dos años de pruebes yá son munches les persones  que tienen certificación d’algamar los niveles B2 y C1, ente elles hai asgaya profesoráu col compromisu de cualificase pa poder enseñar el nuestru idioma o poder impartir otres materies nelli. Amás d’ello cola llexítima motivación d’algamar puntuación cola que  meyorar la so valoración na fase de concursu de los procesos de selección de personal. 

Ye la Conseyería d’Educación la que convoca, ellabora, alministra, evalúa y certifica estes pruebes de competencia llingüística sometíes a la normativa europea, pero paradóxicamente los sos certificaos conviértense en papel moyao al nun poder  valoralos en condiciones d’igualdá coles certificaciones d’otres llingües del Marcu Européu de les Lllingües. 

Les pruebes realícense en dellos institutos d’Enseñanza Secundaria d’Asturies y son les secretaríes d’estos centros les qu’espiden los certificaos de tener superaos los esámenes col preste de la presidencia de la comisión evaluadora. Sicasí, pa poder ser valoraos nes pruebes d’accesu a la docencia (según regula’l Real Decreto 276/2007 de 23 de febrero, por el que se aprueba el Reglamento de ingreso, accesos y adquisición de nuevas especialidades en los cuerpos docentes, nel separtáu- II formación académica- del concursu de méritos) ye menester que la certificación la espida la Conseyería d’Educación, pero col preste de la dirección d’una Escuela Oficial d’Idiomes (EOI): condición que nun cumple’l certificáu d’anguaño. 

Hasta agora tampoco son valoraes estes certificaciones nel separtáu III (otros méritos) al nun tener reconocimientu reglamentariu asturianu pa teneles en cuenta (decreto 62/2001, de 28 de junio, por el que se regulan las actuaciones relativas a formación permanente del profesorado) nos rexistros de formación permanente del profesoráu de la Conseyería Educación.  Consecuencia: nun tienen nengún efectu alministrativu nin n’oposiciones nin concursos de tresllaos nin los efectos económicos correspondientes nel complementu salarial de formación permanente. Y equí sí tien Asturies competencies pal so reconocimientu. Valga como exemplu el País Valencianu onde los certificaos pa la enseñanza en valencianu, el certificáu de Mestre de valenciá o’l C2 de valenciá valórense nel separtáu III, siempre que nun fueren alegaos como requisitu pal accesu,  con 1,75 ó 2 puntos, los dos últimos.

Daqué paecío asocede colos títulos d’Espertu y Especialista en llingua asturiana otorgaos pola  Universidá d’Uviéu. Son dos títulos que, pola so duración, equivaldríen a los actuales títulos de máster y tendríen de ser equiparaos a los niveles avanzaos de competencia llingüística del Marcu Européu de les Llingües.  Estos títulos tampoco son valoraos nel separtáu II (formación académica) de los procesos selectivos. 

Magar que nel últimu congresu de la Federación Socialista Asturiana-PSOE, celebráu’l 18,19 y 20 de marzu de 2022 n’Uviéu, estes organizaciones se definieren como asturianistes, tolos fechos y circunstancies descritos enantes rescamplen el despreciu y la falta de compromisu del Gobiernu asturianu coles nuestres llingües (el gallego-asturianu nin siquier tien regulaes les sos pruebes de certificación). Demuestren tamién la falta de procuru y dilixencia de l’Alministración a la hora de dar seguridá xurídica a les sos actuaciones: nun ye de recibu crear títulos ensin cobertoria reglamentaria que garantice la so valoración. 

En conclusión: el profesoráu d’Asturianu y Gallego-Asturianu vien siendo discriminao, non solo poles sos condiciones llaborales precaries (interinidá, medies xornaes, imposibilidá d’adquirir la condición de funcionariáu de carrera), sinón tamién pola falta reconocimientu de la so formación académica.

Poro, dende SUATEA esiximos a l’Alministración asturiana: 

  • La cobertoria normativa afayadiza pa que los títulos de Llingua asturiana daos por ella (Conseyería Educación y Universidá d’Uviéu) seyan valoraos en condiciones d’igualdá colos de les otres llingües. 
  • La valoración na   formación de les llistes de personal interino de los certificaos B2, C1 y títulos d’Espertu y Especialista en llingua asturiana nel separtáu II de formación académica.
  • Les acciones énte’l Gobiernu Estatal pa que cree o faculte a la alministración asturiana pa crear la especialidá de Llingua Asturiana y Gallego-Asturianu en condiciones d’igualdá con les otros especialidaes llingüístiques.
  • La ufierta obligatoria de la Enseñanza de Llingua Asturiana y Gallego-Asturianu en tolos niveles educativos (Escueles Oficiales d’Idiomes tamién).  

El Secretariáu de SUATEA

 N’Uviéu a 30 de marzu de 2022

Print Friendly, PDF & Email

Esta entrada está disponible en: Castellano (Castellanu)