Día Internacional de les muyeres pola Paz y el desarme

Les muyeres antimilitaristes celebren cada 24 de mayu’l día Internacional de la Muyer pola Paz y el Desarme dende principiu de los años 80. La celebración foi instaurada por muyeres europees pa recordar campañes realizaes poles britániques que s’opunxeron a la OTAN y a la instalación de les sos bases.

  El 28 d’abril de 1915, 1.136 muyeres de 12 países engarraos pola guerra aconceyaron en La Haya coles mires d’aparar la Primera Guerra Mundial, que taba causando milenta muertes. Intentaben formar un mecanismu de mediación que pudiera acabar cola guerra. Los cuatro díes de conferencies remataron cola  unviada de representantes énte los xefes d’Estáu de 14 países (toos homes), y propúnxose la creación urxente d’una Comisión de Paz per parte de los países neutrales. Asina ye como surde la Lliga Internacional de Muyeres pola Paz y la Llibertá, cuntando con una importante fundadora, Jane Addams, socióloga y reformadora social de los Estaos Xuníos y Premiu Nobel de la Paz en 1931.

  Anguaño a pesar de los grupos antimilitaristes, tanto de muyeres como d’homes, los países siguen armándose cada vez más, nos últimos tiempos los gastos militares medraron un 7%.  Encarar los problemes con diálogu, empatía y con interés de solucionar cualquier problema enantes de llegar al conflictu bélicu, nun ye daqué que tengan asumío los mandatarios de la mayoría de países, les lluches “d’egos masculinos” ante un posible conflictu lleva al “yo más y meyor.”

 Nos momentos de crisis de les sociedaes como guerres o desastres naturales, les muyeres algamen un papel bien importante na ayuda humanitaria, intermediaries pacifistes y tresmisores  d’esperanza en conflictos que nun tienen visos de desapaecer. Anque paradóxicamente la figura de la muyer en países postbélicos ye ignorada.

  Como exemplu de muyeres que nun “tiren la toalla“ atopamos a les Muyeres de negru colombianes que dempués de cuarenta años de sentir los horrores de la guerra na so piel y na de les sos fíes y fíos por muerte o desapaición, siguen saliendo a les calles pa recordar al mundu qu’hai qu’esaniciar los exércitos y animar a les muyeres a tener presencia y a esixir una política non violenta en tolos ámbitos de la vida. Ente otros países que siguieron esti movimientu ta España. En payares de 1993 en Mérida, entamáronse unes xornaes contra les guerres de los Balcanes nes que participaron ocho muyeres de Belgráu y delles españoles de sitios estremaos toes contraries a la guerra y  sensibilizaes enforma pol trabayu que taben realizando les muyeres en Belgráu. Dende esti momentu surdieron grupos de sofitu a MdN de Belgráu, que fueron el puntu d’arranque de los grupos españoles. Esisten estes muyeres de negru españoles por toa España, destaquen los grupos de Madrid, Bilbao y Valencia, anque los hai por más localidaes españoles. El negru como color de la pena, el dolor y l’esmolecimientu que mos produz a les muyeres la guerra y la perda de vides d’inocentes.

  Tol mundu sabe que nos conflictos bélicos les muyeres, les neñes y neños son los que carecen directamente la violencia física y sexual, la vulnerabilidá humana y la fraxilidá física en dellos casos fai qu’esta violencia s’exerceza con mayor facilidá sobre elles. Los soldaos aliaos violaron a más d’un millón de muyeres y neñes alemanes dempués de la II Guerra Mundial; en 1937 l’exércitu xaponés ocupó la ciudá china de Nankí y calcúlase en 80.000 les muyeres violaes, na Segunda Guerra ente China y Xapón. Asina una llarga restrera d’otomíes realizaes en cualquier conflictu bélicu contra les muyeres.

  Tamos cansaes de parir pa la guerra, nun queremos conflictos bélicos que se lleven a los nuesos fíos y fíes, maridos y muyeres hermanos y hermanes… Apostamos por un mundu que pare de fabricar y mercar con armamentu pa producir llercia y muerte nel restu de países; queremos que los conflictos se solucionen al traviés del diálogu y del respetu hacia les demás persones… Ye xera difícil, sabémoslo, pero vamos tener que siguir saliendo a les calles reivindicando un mundu pacíficu que sí ye posible si TOOS ponen de la so parte.

24 de mayu de 2019

Organización de Muyer

Confederación Intersindical