Home > Borrador > Día Internaciónal de la Muyer y la Neña na Ciencia

Día Internaciónal de la Muyer y la Neña na Ciencia

En 2015 l’Asamblea Xeneral de la ONU aprobaba un resolvimientu que decidía proclamar el 11 de febreru de cada añu Día Internacional de la Muyer y la Neña na Ciencia. Declaraba que les muyeres, que representen la metá de la población mundial, siguen tando escluyíes de participar dafechu na economía, reconociendo que la so participación nes comunidaes científiques y tecnolóxiques tendría de reforzase porque desempeñen un papel fundamental.

L’añu pasáu, Audrey Azoulay, Directora Xeneral de la UNESCO, por cuenta de la conmemoración del Día, manifestaba que: “la plena igualdá de les muyeres sería la señal más segura de la civilización y doblaría les fuerces intelectuales del xéneru humanu”. Pero tamién reflexaba nel so mensaxe que, magar de los progresos que se fixeron a lo llargo del sieglu XX, sigue habiendo una desigualdá manifiesta que tien de ser motivu de gran esmolición.

N’España la Llei Orgánica 3/2007, pa la igualdá efectiva de muyeres y homes, surde como respuesta combativa a toles manifestaciones de discriminación por razón de sexu qu’entá permanecen,  coles mires d’algamar la igualdá real ente muyeres y homes, y d’esaniciar los estereotipos sociales que torguen algamala. Contempla esta llei que les Alministraciones Educatives van desenvolver ente otres les siguientes actuaciones:

a) L’atención especial nos currículos y en toles etapes educatives al principiu d’igualdá ente muyeres y homes.

f) L’establecimientu de midíes educatives destinaes a la reconocencia y enseñanza del papel de les muyeres na Hestoria.

Sicasí, el mayor estudiu sobro la presencia de muyeres nos materiales educativos, publicáu en 2015 por Ana López-Navayes, revela una media del 7,5% d’apaiciones de muyeres en toles asignatures de la educación secundaria.

La revista Science publicaba en 2017 los resultaos d’una investigación, ellaborada en trés universidaes d’EEXX (de Nueva York, d’Illinois y Princeton), que concluyó que la elección de disciplines académiques per parte de muyeres y homes paez tar influyida poles percepción que se tienen sobro la intelixencia. Y les neñes tienden a pensar que nun son lo suficientemente llistes pa dedicase a disciplines científiques. Sinc Lin Bian, coautora del estudiu, afirmaba que “los estereotipos qu’otorguen una mayor habilidá intelectual a los neños qu’a les neñes remanecen bien llueu y tienen un impactu sobro les aspiraciones profesionales de les muyeres”. Andrei Cimpian, coautor del estudiu, almitía que-yos sosprendiera atopar eses actitúes yá a los seis años.

L’Asociación de Muyeres Investigadores y Tecnólogues, AMIT, Organización non Gubernamental y ensin ánimu d’arriquecimientu, d’ámbitu estatal, integrada por investigadores y tecnólogues, ye dafechu consciente de que’l talentu nun tien xéneru, y de que prescindir del que podría desenvolvese en neñes y adolescentes que nun escueyen una carrera científica por nun tener espeyos nos que vese reflexaes, ye un heriedu cultural que nun  podemos siguir dexando actuar.

Por eso, anguaño llanzóse una campaña nes redes sociales, que sol epígrafe Nun More Matildas, quier denunciar l’olvidu sistemáticu al que fueron sometíes les muyeres científiques a lo llargo de la hestoria. Coles mires de recuperar les sos trayectories, ellaboraron un amiestu pa los llibros de testu, nel que visibilicen a estes muyeres, y amuesen al alumnáu que la ciencia nun tien xéneru.

Coles mesmes , podemos tomar en consideranción la publicación Científiques en Cifres 2017, qu’analiza la presencia relativa de muyeres nos distintos niveles y ámbitos de la ciencia n’España, con especial atención a la carrera investigadora n’universidaes y Organismos Públicos d’Investigación. Les cifres siguen tando llueñe de les deseables. Amuésennos qu’inda ye bien escasa la presencia de muyeres nos cargos de gobiernu, y que se caltién el techu de cristal na carrera investigadora. Dase la circunstancia de que, anque’l 55% de los títulos universitarios los llogren les muyeres, solo ocupen el 20% de los puestos cabezaleros na carrera científica.

Una investigadora pionera, qu’introdució la bioloxía molecular na ciencia española, Margarita Salas, manifestaba, nuna entrevista, la complexidá de ser muyer nun campu como la Ciencia. Falaba de los sos empiezos difíciles, yá que nos años 60 creíase que les muyeres nun teníen capacidá pa la investigación, y cuntaba que cuando empezó a faer la so tesis doctoral, pal so director de tesis yera invisible. Con too, la patente del descubrimientu de Margarita Salas foi la más rentable pa la Ciencia n’España.

Dende la Organización de Muyeres de la Confederación Intersindical queremos manifestar el nuesu compromisu cola llucha pola igualdá de xéneru y el empoderamientu de les muyeres y de les neñes, contribuyendo a llograr el so accesu y la so participación plena y equitativa na ciencia, y recordando, cada 11 de febreru, que la participación de les muyeres y les neñes nes comunidaes científiques y tecnolóxiques tien de fortalecese.

El Secretariáu de SUATEA

N’Uviéu a 11 de febreru de 2021

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348