Home > Comunicaos > Día internacional d’aición pola Salú de les Muyeres

Día internacional d’aición pola Salú de les Muyeres

Desque en 1987 les integrantes de la Rede Mundial de Muyeres polos Derechos Reproductivos alcordaron declarar el 28 de mayu como Día Mundial d’Acción pola Salú de les Muyeres, conmemórase esti día col propósitu de reafitar el derechu a la salú como un derechu humanu al que les muyeres tienen d’aportar ensin restricciones o esclusiones de nengún tipu, y al traviés de tol so ciclu de vida.

En 2005, la Organización Mundial de la Salú, llevó a cabu un estudiu sobro la salú de les muyeres y la violencia doméstica contra elles, l’informe posterior afirmaba que les muyeres son víctimes d’actos de violencia física, sexual y psíquica nel llar, cometíos de cutiu pol so compañeru íntimu, asina como en redolaes onde hai conflictos y, na comunidá, de cutiu por persones que conocen. Dacuando muerren de resultes d’esta situación o permanecen n’entornos inseguros. Los homes, sicasí, suelen ser víctimes d’actos de violencia perpetraos por desconocíos. Fonte: García-Moreno, C., Jansen, H., Ellsberg, M., Heise, L., Watts,C., (2005). WHO Multi-country Study on women’s Health and Domestic Violence against Women. Xinebra: Organización Mundial de la Salú.

Sicasí, nun foi hasta 2009 cuando la OMS ellaboró l’informe Les muyeres y la salú. Los datos de güei, l’axenda de mañana. Esi informe axuntaba un conxuntu de datos básicos sobro la salú de les muyeres y les neñes a lo llargo de tola so vida en distintes partes del mundu y en distintos grupos de población nos países. El VIH, les dolencies rellacionaes col embaranzu y la tuberculosis yeren, y siguen siendo, les principales causes de muerte de les muyeres d’ente 15 y 45 años nel mundu enteru. Sicasí, a midida que la muyer avieya, les enfermedaes non transmisibles pasen a ser les principales causes de fallecimientu y discapacidá, particularmente dempués de los 45 años. En tol mundu, los ataques cardiacos ya ictus, con frecuencia consideraos problemes «masculinos», son tamién les dos principales causes de muerte les muyeres. Como les muyeres avecen presentar síntomes distintos que los homes, les cardiopatíes munches vegaes nun se-yos diagnostiquen correchamente. Tamién tienden a apaecer estes enfermedaes más tarde que los homes.

Cuidao que les muyeres avecen vivir en promediu ente seis y ocho años más que los homes, representen una proporción creciente de la población de mayor edá. Les sociedaes tienen que preparase yá pa encetar los problemes de salú y los costos asociaos cola tercer edá y prever los grandes cambeos sociales que se van producir na organización del trabayu, la familia y el sofitu social.

Dicía la doctora Margaret Chan nel discursu de presentación del citáu informe que, antes d’intervenir énte cualquier problema de salú, yera menester faer balance de la situación porque “lo que puede midise, puede faese” y que […] “cuando comparamos la salú de les muyeres y los homes, los factores que torguen qu’ameyore la salú de la muyer nun son de calter fundamentalmente técnicu o médicu. Son de tipu social y políticu, y dambos cuerren pareyos […]”.

Nel terrén de la salú pública ye más fácil distribuyir melecines que camudar actitúes y comportamientos, sobremanera comportamientos sexuales, o que combatir  la discriminación y ameyorar la situación de la muyer, porque les sociedaes creen relaciones de desigualdá y les polítiques en vigor caltiénenles.

Nesti sentíu, la Estratexa Mundial actualizada pa la Salú de la Muyer, el neñu y l’adolescente 2016-2030 (nótese l’usu sexista del llinguaxe), plantega trés oxetivos fundamentales: Sobrevivir, Espolletar y Tresformar, que riquen, pa la so consecución, la puesta en marcha de múltiples midíes, ente elles un plan de financiamientu y una promoción de lleis, polítiques y normes qu’ayuden a superar les barreres por aciu marcos xurídicos aparentes. Un enfoque centráu na muyer tien de sofitase en dos principios rectores: la promoción de los derechos humanos y la igualdá de xéneru. El derechu a la salú sexual y reproductivo (SSR) ye unu de los componentes del derechu a la salú consagráu nel artículu 12 del Pactu Internacional de Derechos Económicos, Sociales y Culturales. La promoción de la igualdá de xéneru ye fundamental pa llograr la SSR de toles muyeres, esto implica reconocer y tener en cuenta la forma en que’l poder desigual nes relaciones íntimes de les muyeres y les normes de xéneru perxudiciales, afecten el so accesu a los servicios de salú y les sos esperiencies colos mesmos.

Sobro presupuestos y voluntá política n’España, basta con faer una busca del términu “financiamientu” tanto nel Plan Estratéxicu d’Igualdá d’Oportunidaes como na Estratexa Nacional pa la Erradicación de la Violencia contra la muyer, en dambos casos llógrase’l mesmu resultáu: nun s’atopa. De los retayos nos Presupuestos Xenerales del Estáu dimos bona cuenta nes cais apocayá.

¿Cuántes evidencies más tenemos d’apurrir pa demostrar que la desigualdá, los roles y les normes de xéneru son perxudiciales pa la salú de les muyeres?

 

Llunes, 28  mayu de 2018.

Secretaría de la Muyer de SUATEA y Organización de Muyeres de la Confederación Intersindical

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743