Día internacional d’acción pola salú de les muyeres

Güei, día 28 de mayu celebramos el Día internacional d’acción pola salú de les muyeres. La OMS define la salú como “un estáu de completu bienestar físicu, mental y social, y non solo l’ausencia d’afecciones o enfermedaes”. El derechu de les muyeres a gociar de salú integral a lo llargo de tol so ciclu vital, ye un derechu humanu universal consagráu pol sistema internacional de derechos humanos. La salú integral, pela so parte, nun ye namá un fechu biolóxicu, sinón qu’inclúi tamién factores psicosociales, y éstos dependen del llugar que les muyeres ocupen na sociedá (determinantes sociales de la salú), de la so capacidá d’aportar a los recursos materiales y simbólicos pa vivir una vida digna, con igualdá d’oportunidaes, ensin violencies.

La sociedá patriarcal na qu’atopamos niega acaldía a les muyeres el so derechu a la salú, tanto física como mental y social. Los exemplos podemos atopalos nuna ciencia que non yá invisibiliza a les muyeres científiques sinón que tamién refuga la realidá de les muyeres como usuaries de les meyores científiques y la medicina. Resálvense los estudios que revelen los efectos secundarios de les distintes medicaciones na población femenina y tamién  se resalva estudiar los síntomes que les distintes enfermedaes y patoloxíes manifiesten ente les muyeres. D’esta forma munches muyeres lleguen inclusive a finar ensin que se sepa la causa  por cuenta d’infartos que nun son detectaos trataos a tiempu, siendo detectaos namá cuando se realiza l’autopsia.

Otra manera, l’interés de la medicina poles muyeres céntrase única y puramente nos ciclos biolóxicos centraos nes funciones reproductives. Asina, l’interés médicu-comercial esmolezse por vender métodos anticonceutivos a les muyeres pa dempués vende-yos melecines qu’adonden los efectos indeseaos de la menopausia, chocante ye nel casu de l’andropausiaque  nun conozamos tanto bombardéu publicitariu.

Pero la salú de les muyeres nin siquier esmolez cuando realmente son más “útiles” a la sociedá, esto ye, mientres l’embaranzu y el partu. El patriarcáu ocupóse tamién d’apoderase d’esos momentos únicos pa les muyeres, non yá modificando les postures naturales pa parir sinón convenciéndonos de que la meyor forma pa faelo ye por aciu partos programaos que deriven nun altu númberu de partos instrumentalizaos y cesaries. Esto  tien como consecuencia directa un mayor períodu de recuperación pa la puérpera.

El mayor de los despropósitos  a la d’ignorar la salú de les muyeres ye la unión del patriarcáu col neolliberalismu pa convertir a les muyeres en banduyos d’arriendu. Emplegando les muyeres como xestantes d’unos fíos y fíes que-yos van ser arrebataos y arrampuñaes nel momentu que nazan. Esti mercáu atenta non yá contra tolos principios de la ética sinón tamién contra la salú de les muyeres en tolos aspeutos. Nel ámbitu físicu escaécense tolos riesgos que puede traer un embaranzu pa la muyer preñada.  Nel ámbitu mental convierte a la muyer nuna incubadora p’aprovir de descendencia a quien, por razones diverses nun quier o nun puede tenela biolóxicamente, desproveyendo a la muyer xestante de tolos sentimientos y venceyos que s’establecen mientres la xestación y el partu. Y, p’acabar, nel aspeutu social omítese l’usu de les muyeres de les clases sociales más desfavorecíes pa satisfaer los intereses del más brutal de los capitalismos amarutándolo col mitu de la llibre elección.

Finalmente, nun podemos escaecer como acaldía munches muyeres non yá pierden la salú sinón inclusive la vida poles continues agresiones de los fíos del patriarcáu. Nel estáu español, no que va d’añu, contabilizáronse yá 29 feminicidios.

Énte esta situación la Organización de Muyeres de la Confederación Intersindical y SUATEA esixe:

–           Inversión a los gobiernos de los distintos estaos y al d’España sobremanera, n’investigaciones científiques qu’enceten los problemes de salú de les muyeres.
–           Que los llaboratorios farmacéuticos investiguen los efectos secundarios de les medicaciones na población femenina y qu’estos efectos secundarios se tengan en cuenta a la de la comercializales.
–           Que se torgue a nivel internacional cualquier forma de comerciu col cuerpu de les muyeres.
–           Que s’encete la implementación de planes de salú integral pa les muyeres.

Uviéu, 28 mayu de 2017

Organización de muyeres de la Confederación Intersindical y SUATEA