Home > Muyer > Día européu pola Igualdá salarial

Día européu pola Igualdá salarial

Con motivu del Día européu pola Igualdá salarial que se celebra’l 22 de febreru, la Organización de Muyeres de SUATEA, integrada na de la Confederación Intersindical, denuncia la persistencia de discriminación derivada de la resquiebra salarial ente muyeres y homes y esixe que s’afiten les midíes y modificaciones llegales precises que permitan llograr la igualdá salarial como pasu fundamental pa llograr la igualdá real ente muyeres y homes.
El salariu de los homes españoles ye un 19,3% superior al de les muyeres, mentres qu’a nivel européu esa estremadura asítiase nel 16,3%, según datos asoleyaos pola Comisión Europea (CE).
Nun comunicáu la CE reflexó’l fechu de que’l salariu mediu por hores de les muyeres europees seya un 16,3% inferior al de los homes, esto quier dicir qu’elles trabayen gratis 58 díes al añu.
L’Executivu comunitariu publicó la resquiebra salarial por xéneru ente los países de la Unión Europea, desque’l 2 de payares representa simbólicamente’l día nel que les muyeres n’Europa dexen de tar remuneraes, mentras que los homes siguíen cobrando’l sueldu hasta’l 31 d’avientu.
Los países onde la resquiebra ye menor son Eslovenia (3,2 %), Malta (5,1 %), Polonia (6,4 %) ya Italia (7,3 %), y los que tienen  mayor diferencia a nivel de salarios ente homes y muyeres son Estonia (29,9 %), Austria (23 %), la República Checa (22,1 %) y Alemaña (21,6 %).

Llabores non remuneraos
Na UE, les muyeres responsabilícense muncho más que los homes de “importantes llabores non remuneraos, como’l trabayu domésticu, curiar neños o familiares”, según la CE.
“Los homes que trabayen dediquen de media 9 hores selmanales a actividaes doméstiques o de curiar persones dependientes que non son remuneraes, mientres que les muyeres trabayadores ocúpense d’ello 26 horas selmanales, casi cuatro hores al día”.
Según los datos de la Comisión, “nel mercáu llaboral esto refléxase nel fechu de que más d’una de cada tres muyeres reduz les hores pagaes a tiempu parcial, cuando namás qu’ún de cada diez homes lo fai”.

Los puestos directivos, acutaos por homes
Amás, “los puestos directivos o de supervisión tán tomaos casi dafechu polos homes”, y dientro de cada sector, ellos reciben promociones con más frecuencia qu’elles, y darréu d’eso, págase-yos más, según la CE. Esa tendencia remata nos cargos más altos, onde  menos del 4 % de los directores xenerales d’empreses son muyeres.
Per otru llau, “elles tienen enclín a pasar más tiempu fuera del mercáu llaboral”, con interrupciones de carrera que depués repercuten nos futuros ingresos y pensiones.
En dellos de países onde profesiones como l’enseñu o les ventes son feches sobre too por muyeres, esos trabayos tienen salarios peores qu’otres qu’ocupen los homes, “incluso cuando pa exercer unes y otres fai falta igual nivel d’esperiencia y educación”.
“La igualdá ente los homes y les muyeres ye ún de los valores fundamentales de la UE, pero esti día (2 de payares) alcordámonos de que nun ye una de les nuestras realidaes fundamentales”, y esto denunciáronlo nun comunicáu conxuntu el vicepresidente primeru de la CE, Frans Timmermans, y les titulares europees d’Emplegu Marianne Thyssen, y Justicia, Vera Jourova.

‘Resquiebra inxusta’
“La resquiebra salarial ene muyeres y homes ye inxusta, inxustificada ya inaceptable a curtiu plazu. Pero a llargo plazu va entorpeciendo la carrera d’una muyer y da nuna resquiebra mayor a nivel de la pensión, con una diferencia media del 39 % en favor de los homes”.
Europa cuenta con normes sobre la igualdá de salariu, pero “los Estaos miembros nun les apliquen de manera curiosa” y “hubo poco o nada de progresu nos últimos años”.
Los comisarios dixeron que nel programa de trabayu de la CE pa 2016 diben tomase midíes pa responder a estos retos, cola fin de aidar a los padres y madres que trabayen y tienen fíos al cargu y a les persones que curien familiares dependientes pa llograr un equilibriu ente esa dedicación y la so carrera profesional.

Cada vez más lloñe.
La resquiebra salarial ente homes y muyeres n’España asítiase nel 24 por cientu, la más alta de los últimos cinco años, según un informe qu’esplica que pa cobrar una pensión de la mesma cantidá una muyer tien que trabayar once años y mediu más qu’un home nun trabayu  d’igual valor.

La muyer tendría que trabayar 79 díes más.
Partiendo de los datos del informe que publicó l’INE en 2012, les trabayadores cobraron esi añu de media 19.537 euros, 6.144 euros menos que los homes (que percibieron una media de 25.682 euros), polo que les muyeres tenene que trabayar 79 díes más al añu qu’un home pa cobrar igual.
Por comunidaes autónomes, Aragón y Navarra, son les que rexistren una mayor resquiebra, mentres que Baleares y Canaries son les que menos. “El tener menos diferencia nun ye pa tar más contentu, porque en delles comunidades les diferencies son más pequeñes porque los salarios de los homes tamién son más baxos”.

Por sectores, la resquiebra ye superior a la media n’actividaes alministratives y servicios (33,21 %), actividaees profesionales, científiques y técniques (31,69 %) y sanitaries y servicios sociales (30,33).
Sicasí, destacó’l sector de la educación como’l más afectáu poles baxaes de salarios y ye onde la resquiebra se triplicó nos últimos cinco años.
España ye cabezalera d’Europa na resquiebra salarial en rellación coles xornaes de trabayu a tiempu parcial, que s’asitia nel 33,7 por cientu.

La resquiebra salarial en 5 datos
• Una muyer tendría que trabayar 79 díes más al añu pa ganar lo mesmo qu’un home.
• Una trabayadora tendría que cotizar once años y mediu más qu’un trabayador masculín.
• Ellos ganan 6.000 euros al añu de media más qu’elles.
• Aragón ta’l primeru en desigualdá: 29,9%.
• Baleares tien la menor diferencia salarial con poco más del 16%.
Estos datos tienen que nos llevar a camentanos  sobre los motivos y les razones poles que nun se ye a eliminar esa resquiebra, especialmente n’España. A pesar del la entrada importante de muyeres nel mercáu de trabayu y de que les muyeres tán güei enforma más preparaes que les de fai sólo dos décades, pesie que les muyeres son les que llegan en mayor cantidá a la universidá, algamen les notes más altes y acaben primero los estudios, ensin embargu, el mercáu de trabayu nun respuende a les sos expectatives. Les razones de les desigualdaes salariales son mui complexes porque intervienen factores asgaya, como los prexuicios sociales, los estereotipos, la falta de corresponsabilidá nes families, la formación, la economía, les aiciones llexislatives, etc. Les muyeres nun reciben el mesmu salariu que los homes principalmente porque nun ocupen los mesmos puestos, ye dicir, porque sigue la segregación horizontal, que concentra a las muyeres en dellos sectores de l’actividá y en delles ocupaciones; y la segregación vertical, que supón un repartu desigual d’homes y muyeres na escala xerárquica y quita a les muyeres d¡acceder a los puestos de decisión y a los más remuneraos.

Por too ello, dende la Organización de Muyeres de SUATEA consideramos que ye preciso rearmar la conciencia crítica sobre los mecanismos de perpetuación de les desigualdaes y tamién romper los estereotipos de xéneru que trescalen tola sociedá p’abrir la igualdá de condiciones y de derechos pa tola población. Amás, fai falta afitar midíes urxentes pa que les muyeres accedan a empleos de calidá, esixendo  que s’apliquen les lleis en materia laboral, con Planes de Igualdad y convenios colectivos que valgan pa desaniciar la desigualdá, asina como establecer servicios públicos que faigan pola conciliación de la vida personal, familiar y llaboral de los homes y muyeres trabayadores, porque namás d’esa forma se va dir a mayor autonomía ya independencia económica de les muyeres.

22 de febreru de 2016
Organización de Muyeres de SUATEA y de la Confederación Intersindical

Esta entrada tamién se puede consultar en: Castellanu