Día de la visibilidá lésbica

El 26 d’abril celebramos el Día de la Visibilidá Lésbica, una fecha p’alcordase de la importancia de que les muyeres lesbianes seyan visibles nel espaciu públicu y referentes en tolos ámbitos y non solo na estaya del activismu polos derechos LGTBI.

Nesta sociedá patriarcal, qu’invisibiliza a toles  muyeres en tolos ámbitos sociales, onde namás s’impón el modelu hetero, les muyeres lesbianes son doblemente discriminaes, pol so sexu y pola so orientación sexual.

Enantes yera’l propiu Estáu’l que castigaba y persiguía la homosexualidá, polo que la llucha contra la lesbofobia tien que pasar inevitablemente porque les instituciones-y dean a los movimientos LGTBI y al feminismu la reconocencia que merecen, porque ensin ellos nun tendríamos nin los derechos fundamentales.

Ser lesbiana sigue siendo un estigma castigáu y perseguíu en munchos países del mundu. N’otros, a los que-yos llamamos “desarrollaos”, sigue siendo difícil asoleyase.

De los crímenes por odiu a les violaciones correctives, les violencies machistes que sufren les muyeres lesbianes son abondes. A veces, la única protección delantre d’elles ye tapecese, contribuyendo asina a la invisibilidá a la que les somete tamién la sociedá. Una sociedá patriarcal que sigue negando la realidá y escondiendo que les muyeres somos más de la mitada.

Les lluches polos derechos LGTBI llográronse pola visibilidá d’homes homosexuales, pero ¿Ú les activistes lesbianes, bisexuales, transexuales? Invisibilizaes cómo nes demás lluches y demás ámbitos.

La historia siguen escribiéndola los homes. La presencia de lesbianes ye enforma menor que la de gais en tolos ámbitos sociales, la política, la cultura o la historia. La falta de referentes de lesbianes nel mundu públicu fai difícil qu’otres «salgan del almariu”. Si lo que nun tien nome nun existe, tenemos qu’asoleyar el compromisu políticu y social d’acabar con tola discriminación y poder incorporar a toles muyeres, con independencia de la orientación o identidá, en cualquiera de les estayes sociales.

Nel Estáu español, la invisibilidá social del lesbianismu, l’acosu escolar y les agresiones medren de forma alarmante. Amás, los retayos en gastu social y en política d’igualdá o la precariedá llaboral afectaron más a les lesbianes, escluyíes tamién de tener recursos en materia de violencia de xéneru. Doblemente discriminaes.

Güei volvemos a alcordanos de qu’esta invisibilidá tien consecuencies. Por exemplu, na atención sanitaria que reciben les lesbianes. Los protocolos xinecológicos y les polítiques de prevención  de ETS nun contemplen les práctiques sexuales ente muyeres. Tamién que’l Gobiernu del Estáu tien apartaes a les lesbianes de la reproducción asistida.

Vemos que los nuestros derechos son atacaos por una sociedá hetero-patriarcal que nos tien invisibilizaes y escondíes nel ámbitu priváu. Somos muyeres, lesbianes, bisexuales, autónomes, diverses. La diversidá nunca pue valir pa la esclusión y la discriminación. Queremos igualdá real y efectiva pa toes, ser quien a escoyer la nuestra sexualidá, estremada del modelu hetero-patriarcal. Queremos ser les protagonistes porque la invisibilidá condérganos. Visibilidá lésbica!

26 d’abril de 2017

Secretaría de la Muyer de SUATEA- CI de STEs