Home > LGTB > Día de la visibilidá lésbica

Día de la visibilidá lésbica

 

Dende fai 11 años cada 26 d’abril celebramos el Día de la Visibilidá Lésbica nel nuesu país porque . Nuna sociedá heteropatriarcal na que cualquier muyer ta discriminada, les muyeres homosexuales sufrimos una doble discriminación: la que va “de serie“ por ser muyer y la extra por llesbiana.

A lo llargo la historia tuvimos que soportar persecuciones, prexuicios y otres barbaries que tovía persisten en 72 países onde se faen internamientos n’instituciones mentales, terapies de conversión y electroshock, violaciones correutives, penes de cárcel ya inclusive de muerte, amás del refugu familiar, social y llaboral pol fechu ser lesbianes. Esta hestoria de represión, como ye bien sabío, tamién infecta les vides de transexuales, gais, bisexuales y intersexuales.

N’España, magar les meyores algamaes nes últimes décades –lluchemos y consiguimos la igualdá de derechos en munchos ámbitos gracies a la llucha del movimientu feminista y de los colectivos LGTBI–  tovía son munchos los llogros pendientes d’algamar pa falar de plena igualdá o igualdá real. Por ello, siguimos esperando una Llei d’Igualdá LGTBI que sofite y garantice  verdaderamente los nuesos derechos.

La discriminación machista y lesbofóbica nel ámbitu familiar, social, educativu y llaboral sigue siendo una realidá. Valgan como exemplu dalgunes de les siguientes situaciones qu’inda asoceden a día de güei: les pareyes de llesbianes tenemos que casanos pa poder inscribir a les nueses fíes y fíos nel Rexistru Civil; nun esisten protocolos de calter institucional, nin formación específica sobre salú sexual de muyeres que tienen relaciones con muyeres. El colectivu LGTBI encabeza les estadístiques de víctimes por delitos d’odiu a pesar de que casi un 80% de les agresiones nun se denuncien por mieu a visibilizase.

Pa romper el silenciu resulta imprescindible’l sofitu institucional. Les Alministraciones Públiques y los Gobiernos al mandu tienen de promover acciones de sensibilización na sociedá, y eso rique, polo menos, la puesta en marcha de midíes qu’aseguren una formación específica de les persones dedicaes profesionalmente a la docencia, la sanidá, la xusticia y la seguridá. Concretamente, n’educación ye imprescindible encetar la incorporación de conteníos curriculares sobre diversidá afeutivo-sexual, de xéneru y familiar en tolos niveles educativos y tamién na formación universitaria de futuros docentes. De la mesma, ye menester promocionar referentes de muyeres lesbianes en toles esferes públiques, política y social. La visibilidá en tolos ámbitos (social, cultural, políticu, sanitariu y educativu) ye la base pa crear dichos referentes, normalizar y promover el nuesu apoderamientu y el de les nueses families.

Como dixo Kate Millet lo personal ye político, y lo político afeuta a tolos ámbitos de la nuesa vida. Nesti sentíu, la medría de la ultraderecha vuelve poner en peligru les instituciones democrátiques cola pretensión de facenos retroceder décades en materia d’igualdá, amenaciando los nuesos derechos fundamentales, esos que tanto mos costó alquirir. Quieren invisibilizanos, borranos de la sociedá. Quiciabes esperen que volvamos mansamente a los armarios más escuros, o que les nueses families dexen de ser consideraes como tales ensin gorgutar. Equivóquense.

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778