Día d’Aición Global pola Despenalización del Albuertu

Esta entrada está disponible en: Castellano (Castellanu)

Esti 28 de setiembre, Día d’Aición Global pola Despenalización del Albuertu, bien siendo dende 1990 un día simbólicamente perimportante pa toles muyeres. Esta efeméride nació en Latinoamérica y non por casualidá, sinon motivada pol altu númberu de muertes de muyeres, causaes por albuertos inseguros y clandestinos. Munches vides quedaren atrás nesta llucha pola despenalización del albuertu y pola protección de la salú de les muyeres. Son munchos, los países onde se sigue penalizando l’albuertu, recortando’l derechu al control de la maternidá, o eliminando dafechu l’accesu a un serviciu sanitariu seguro, que torne estes consecuencies evitables y cruentes.

N’España, la paralización del Anteproxectu de llei por parte del Gobiernu traxo un respiru pa toles muyeres que defenden el so derechu a la salú y a escoyer llibremente la so maternidá; foi un refuerzu moral y llegal pa toles que se vieron puestes en duda por optar a la interrupción del so embarazu, delles incluso aterrorizaes, sometíes a amenazes, insultos y vergoña pública por grupos anti-elección, toos ellos col argumentu del “derechu a la vida”, pero ensin respetu a la persona viva que tienen delantre.

Agora, el Gobiernu llogró, gracies a la so mayoría absoluta, modificar la llei de salú sexual y reproductiva y de la interrupción voluntaria del embarazu, quitando l’autonomía de decisión a les menores de 16 años.

Nestos momentos, nel Estáu español sigue taramingando sobre les muyeres una espada de Damocles na regulación del albuertu, porque ésta nun ye namás una cuestión política, nin electoralista, ye una cuestión ideolóxica y “de fondes convicciones”: la consideración de la muyer como ente de plenu derechu o la consideración de la muyer como suxetu pasivu, ferramienta de reproducción, curiadora de la prole y pegollu del sistema productivu capitalista y patriarcal, respaldáu pola Iglesia Católica dende siempre, como apoloxista y llexitimadora moral d’esta teoría socio-económica.

El derechu al albuertu forma parte de los derechos reproductivos de les muyeres, siendo l’aniciu de munchos otros derechos que determinen la so llibertá. D’igual manera que’l derechu al votu foi’l sofitu material pa la nuestra llibertá, pa poder controlar la nuestra maternidá y que nos da l’emburrión pa ser ames de les nuestres vides.

Una sociedá que penaliza el’albuertu ye la que lu considera delitu y delincuente a quien opta por ello. Una sociedá que despenaliza l’albuertu ye la que cuida que la maternidá merez protexese con un sistema sanitariu públicu, gratuitu y seguru, que garantice que s’exerza en condiciones deseables y deseadas y ve a les muyeres como responsables y ames de les sos vides y los sos cuerpos.

Por eso, dende la Organización de Muyeres de la Confederación Intersindical,  naguamos por una despenalización del albuertu y güei más que nunca reivindicamos:

  • La despenalización del albuertu nel Estáu español.
  • La protección de la salú de les mueyeres cola garantía del accesu a un albuertu seguru, gratuitu y llibre na rede sanitaria pública para toles muyeres.
  • El respetu d’autonomía pa escoyer de les moces qu’opten por interrumpir l’embarazu. De nenguna manera puede obligase a una muyer a ser madre escontra la so voluntá.
  • L’aumentu de la inversión en prevención d’embarazos non buscaos con educación afectivo-sexual nes aules dende etapes tempranes, y l’accesu de baldre a medios anticonceptivos para toles muyeres.
  • La inclusión nos currículos escolares de conteníos específicos que faigan pola igualdá de derechos ente homes y muyeres y la eliminación darréu de conciertos educativos a escueles qu’estremen neñes y neños con modelos educativos diferentes, potenciando un tratu educativu y sociolóxicu estremáu pola mor del sexu.
  • El respetu a los derechos sexuales y reproductivos de toles persones independientemente de la so orientación sexual y el so modelu de familia.
  • El nuestru refugu de cualquier llei o mecanismu llegal que acute la tutela y el control de los cuerpos de les muyeres y la so maternidá.

Esti 28 de setiembre tamos na cai, a defender el nuestru derechu y el de toles muyeres a un “ALBUERTU LLIBRE, SEGURU Y DE BALDRE, LES MUYERES DECIDIMOS“,

Organización de Muyeres de la Confederación Intersindical
Madrid – 28 de setiembre de 2015

Print Friendly, PDF & Email

Esta entrada está disponible en: Castellano (Castellanu)