Home > Centros educativos > Defectuosa organización con escasu profesoráu

Defectuosa organización con escasu profesoráu

Ayeri y güei, 1 y 2 de setiembre, hubo dos meses sectoriales de negociación de les midíes propuestes pola Alministración pal cursu 2020/21, que fueron refugaes de forma unánime por toles Organizaciones Sindicales.
Dende SUATEA, otra vuelta más, pensamos que ye de llamentar esta situación que nos empobina a un entamu de cursu con incertidume y pola adopción d’unes midíes que, envede antemanase a los acontecimientos, lleguen a remolque de la realidá que determina la pandemia sanitaria.
Poro, creemos que los últimos cambeos introducíos pola Conseyería suponen una meyora al respective de la postrera propuesta de xunetu, nel sen de qu’agora tiénense en cuenta dellos aspeutos que vinimos reclamando dende l’entamu del branu, anque queden llueñe de los nuesos pidimientos. Son dos los temes centrales que consideramos qu’hai d’encetar y asina aportunemos en toles ocasiones que se nos ufiertó: l’amenorgamientu de ratios d’alumnáu per aula y el reforzamientu de les plantiyes.
No que cinca a la primera, entendemos que ye l’aspeutu nel que más se movió la Conseyería, al ufiertar la formación de grupos de 20 alumnos/es hasta 2º d’ESO, que na propuesta de xunu llegaba namás hasta 4º de Primaria. Entá quedando lloñe de les nueses pretensiones, que proponíemos grupos de 12/15 alumnos/es por aula en tolos niveles, valoramos positivamente esta meyora, pero creemos que nun resuelve la situación. La midida de semipresencialidá pal restu de Secundaria y Bachilleratu pensamos que ye un atayu que, en cuenta d’amenorgar la presencia nes aules del alumnáu, crea una situación nueva que va repercutir na calidá de la enseñanza-aprendizaxe. Afectando de manera desigual al alumnáu que pueda tener atención presencial diaria y a quien tenga d’allegase al centru en díes alternos ensin recibir atención telemática nos díes non presenciales.
Al respective’l reforzamientu de la plantiya docente, yá denunciemos en dellos medios de comunicación que les cifres ufiertaes pola Conseyería, analizaes en detalle, son engañoses, porque nun reflexen nenguna variación sustancial al respective de la plantiya del cursu pasáu. Anúnciase una nueva convocatoria de 559 vacantes, supuestamente p’ameyorar la plantiya nesta situación escepcional, pero la plantiya quedaría asina por debaxo de les places convocaes pal personal interino’l cursu pasáu. Además tamién debíen de sumase les vacantes surdíes de les xubilaciones que se producieron a lo llargo del cursu pasáu, que suponen más de 400 places de plantiya. Por eso, aportunamos, les cifres que dieron nun respuenden a les necesidaes.
Con too esto, SUATEA presentó una riestra de pidimientos que tampoco fueron teníos en cuenta como:

  1. Urxencia máxima d’una segunda convocatoria de vacantes pa dotar a los centros de personal enantes del empiezu de les clases. Axilización de les sustituciones posteriores con a lo menos dos convocatories selmanales de profesoráu interino Y un alcuerdo interinidá que dote de mayor estabilidá al personal interino.
  2. Eliminación de la organización en grupos por optatividá de calter confesional.
  3. Mayor concreción polo xeneral y particularmente na organización de los escenarios 2 y 3. 4. Implantación de trés hores de tutoría pa Bachilleratu y Primaria
  4. Amenorgamientu de la xornada lectiva. 23 hores llectives pa Educación Infantil y Primaria.
  5. Dotación abonda d’ordenadores, conexón y materiales TICS pal trabayu telemáticu.
  6. Potenciar la figura del docente que coordina les TIC en cada centru.
  7. Formación urxente en TIC a les families: Escuela TIC pa families.
  8. Empléu de sistemes operativos y aplicaciones llibres.
  9. Presencia de personal sanitario nos centros.
  10. Dotar al profesoráu d’equipos de protección frente al Covid-19 con especial atención a la especificidá de los equipos que tien d’utilizar el profesoráu qu’atienda al alumnáu de EI y NEAE.
  11. Aclaración de protocolos pa persones d’especial vulnerabilidá.
  12. Directrices comunes pa ellaborar l’adautación de los currículos y les programaciones de los cursos, árees y materies.
  13. Normativa que regule les condiciones llaborales de la docencia telemática.
  14. Midíes específiques pa la conciliación familiar del profesoráu na pandemia.
    A la falta de rempuesta a estes cuestiones organizatives hai qu’añedir la escasez de la inversión, de medios materiales, d’espacios, les ratios y les plantiyes que son el fundamentu nel qu’asitiar una educación calidable y con garantíes sanitaries.
    SUATEA llamenta que los cambeos llegaren tarde y nun sean bastante. Por desgracia, siguiendo cola práctica habitual, la Conseyería convoca les Meses Sectoriales pa presentar propuestes cuasi zarraes, inclusive presentaes primero a los medios de comunicación, que baleren el conteníu d’una negociación que na práctica nun esiste.

N’Uviéu a 2 de septiembre de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348