Home > Profesoráu > Decretu d’Orientación Educativa y Profesional

Decretu d’Orientación Educativa y Profesional

L’Alministración ellaboró’l Decretu que regula la orientación educativa y profesional. Más d’una década depués de que la nuestra Comunidá asumiera les competencies n’Educación facíase necesario superar la situación actual y dir afitando les bases d’un modelu d’Orientación que d’otru llau entá ta siendo oxetu de debate en dellos Equipos de zona.

Dende SUATEA gustáranos un procesu de debate más llargu y compartíu, pero tamién reconocemos la flexibilidá de l’alministración al aceptar parte de les nuestres alegaciones y ameyorar sustancialmente’l documentu final respecto al que primeramente se punxo sobre la mesa. Dimos el nuestru sofitu en cuantes qu’inclui una serie de compromisos que van dexar un aumentu de personal especialista, l’amenorgamientu de les ratio y una garantía de presupuestu pa desendolcalu ensin que les intenciones se conviertan en papel moyao. De la mesma manera ye importante’l caltenimientu de les condiciones llaborales y la organización de les zones de los Equipos d’Orientación como funcionen anguaño.

Vamos tar esperando col mesmu espíritu críticu y constructivu les normes que necesariamente hai que desarrollar pa completar esti Decretu que resulta xenéricu ya imprecisu en delles cuestiones que s’aborden. Dende l’alministración hai un compromisu n’ellaborar:

  • Una resolución sobre l’Atención Temprana que regule’l trabayu d’estos equipos y a la que fiximos una serie d’aportaciones que tendríen de tenese en cuenta.
  • Un Decretu d’Atención a la Diversidá nel que trate lo tocante al personal de PT y AL y que compense la minoración de puestos que se lleva sufriendo apocayá, y tamién que determine los criterios pa una atención al alumnáu acordies coles necesidaes reales y que contribuya de verdá a una educación de calidá.

Empecipió un procesu y en SUATEA vamos siguir reivindicando una orientación potenciadora d’una educación pública, inclusiva, laica y non sexista, que dexe construyir una ciudadanía crítica en contestos educativos democráticos y que nun dexe que’l llabor orientador vaiga empobináu a l’adaptación al mercáu llaboral tal que se pretende con oxetivos de la Estratexa de Lisboa.

DESCARGAR PDF

[Actualización 27/12/2014: Decretu 147/2014, del 23 d’avientu, pol que se regula la orientación educativa y profesional nel Principáu d’Asturies.]

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743