Convocatoria d’oposiciones del Cuerpu de Maestros: mal entamamos

Esta entrada está disponible en: Castellano (Castellanu)

Nel BOPA de güei, 8 d’ochobre de 2021, publicóse la resolución de convocatoria d’Oposiciones pa celebrase nel añu 2022 qu’afecten al cuerpu de maestros nel Principáu d’Asturies.

Sospriéndenos la rapidez cola qu’esta Conseyería da en formalizar una convocatoria que, de normal, faise pública nos primeros meses del añu nel que se van a realizar les pruebes anunciaes. Desconocemos cuáles pueden ser les motivaciones que tán tres esta decisión, pero nun dexa de ser llamentable qu’una selmana antes la mesma Conseyería mos unviare un documentu- borrador pidiendo discreción y xenerando delles mires de celebración d’una negociación formal o siquier la posibilidá d’un intercambiu d’opiniones y recoyida de suxerencies. Llamentamos que con esta primer decisión se ruempa col deséu que se nos tresmitiera dende la Conseyería d’abrir un periodu nuevu de comunicación, intercambiu y diálogu. Dacuando, les inercies empónense a los deseos de cambéu.

Creemos qu’esta temprana convocatoria ye un error que va perxudicar a quien aspiren a presentase a eses oposiciones del añu 2022 cuidao que cierra la posibilidá de presentar méritos y actualizar la formación na primer metá del próximu mes de payares. Quien planiaren cursos, actualizaciones de Grau, etc. ven, con esta decisión, esbarataos los sos planes.

Pero si mos paez llamentable esto, más esmolición mos xenera’l desenvolvimientu de les polítiques d’empléu públicu de los últimos años y les posibilidaes d’estabilización del personal interino. Nel añu 2017, col PP entá nel Gobiernu, los sindicatos CCOO, UXT y CSIF roblaron un Alcuerdu pa la Estabilización nel Empléu que se nos presentó como’l meyor alcuerdu de la hestoria cuidao que tenía como oxetivu amenorgar la tasa d’interinidá al 8%, daqué que dende SUATEA y la Confederación de STEs consideramos invidable y peligroso nel so día.

Trescurríos cuatro años, los datos son concluyentes: les tases d’interinidá siguen percima del 30% nel ámbitu docente y xeneralizóse la precarización coles medies xornaes. Nel so momentu esiximos dos condiciones fundamentales como son la mayor valoración de l’antigüedá y los méritos nes pruebes y el calter non eliminatoriu de les mesmes.

La combinación de puntuación referida a les fases d’oposición y concursu ta regulada pol Real Decretu 276/2007, de 23 de febreru, qu’establez en 2/3 y 1/3 respectivamente la puntuación pa cada fase. Esto prima la fase oposición, na que s’impon un criteriu memorísticu non venceyáu a la práctica docente n’aula. Pa convencenos de que “les oposiciones son la solución”, los sindicatos firmantes axustaron un alcuerdu transitoriu que se recoyó n’otru RD del añu 2018 nel que s’afitaba una valoración del 60% pal concursu y un 40% pa la oposición.

Güei, con una medría de la precariedá y un porcentaxe asemeyáu de personal interino, volvemos al puntu de partida nel que se fai de menos la esperiencia docente. La nueva convocatoria asitia en 1/3 la proporción pa la fase de concursu y en 2/3 pa la fase d’oposición.

Tocántenes al calter eliminatoriu de les pruebes, anque había unanimidá sindical pa pidir que les pruebes nun fueren eliminatories, el gobiernu del PP caltúvose inflexible. Les pruebes yeren y van siguir siendo eliminatories. Curiosa la posición del PSOE, qu’entós sofitaba la propuesta sindical y, güei cuando ta al frente del Gobiernu, arrenuncia a les propuestes defendíes enantes.

Viendo los resultaos llograos nestos últimos años, dende SUATEA siguimos pensando que, col actual porcentaxe d’empléu interín (cerca del 30% del total), la ufierta d’empléu públicu nun cumplió, pa nada, l’oxetivu previstu d’amenorgar la tasa de temporalidá nes alministraciones públiques y, lo que ye peor: aumentó la precariedá llaboral.

En nengún casu, amás, s’intentó sancionar a l’alministración pol abusu de la contratación temporal, mientres se torga sistemáticamente facilitar l’accesu al personal que lleva soportando esi abusu a lo llargo los años. Siguimos aporfiando na necesidá d’abrir un procesu que contribuya a estabilizar al personal que cunta con una antigüedá de más de trés años, asemeyao a lo qu’asocede na empresa privada. Nesti tiempu, produciéronse dos novedaes fundamentales: la Sentencia de 19 de marzu de 2020 del Tribunal de Xusticia de la Unión Europea que reconoz l’abusu cometíu poles Alministraciones Públiques y la sentencia del 3 de xunu de 2021 onde s’especifica que’l procedimientu de concursu-oposición nun ye’l métodu afayadizu de sanción.

Ante la necesidá de resolver esti asuntu, la respuesta de les alministraciones ta siendo la convocatoria masiva d’oposiciones ensin tener en cuenta los derechos del personal interino.

Los sindicatos mayoritarios siguen calteniendo que los alcuerdos roblaos valen pa consolidar les places, pero dende SUATEA aportunamos en que, primero que les places, hai qu’estabilizar a les persones. La vuelta a la ponderación de 1/3 – 2/3 asítianos otra vuelta nel puntu problemáticu de partida (escesu de personal temporal) qu’eses organizaciones queríen solucionar. Les oposiciones nun son la única solución pa la estabilización. Tres el fracasu del Plan d’Estabilización, el personal interino va siguir teniendo qu’encarar la paradoxa de carecer una política d’empléu que, en llugar de consolidar el so trabayu, pue ponelo na cai cola tolerancia de los sindicatos mayoritarios y Alministraciones.

Nun dexa de ser indecente que se convoquen oposiciones de forma esprecetada en toles Alministraciones coincidiendo col momentu nel que se ta tramitando’l “Icetazu” como proyectu de llei nel Congresu de los Diputaos. Un proyectu de llei que plantega, nel so orixe, poner fin al trabayu interino llindando la contratación a un tiempu máximu de trés años. Con ello esaniciaríase d’un refundiu la reconocencia de los derechos a estabilizase nel empléu reconocíos poles directives europees y les mentaes sentencies del Tribunal de Xusticia de la Unión Europea.

Poro, dende SUATEA esiximos l’afitamientu nos puestos de trabayu del personal interino contratao n’abusu de temporalidá.

El Secretariáu de SUATEA

N’ Uviéu, 8 d’ochobre de 2021

Print Friendly, PDF & Email

Esta entrada está disponible en: Castellano (Castellanu)

Hai un profesoráu al pie del cañón, pero ensín empleu estable

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757