Contra la propuesta d’Iceta

Esta entrada está disponible en: Castellano (Castellanu)

La propuesta del ministru Iceta de cambéu del EBEP plantega cesar al personal interino que lleven trés años nuna mesma plaza                                                                                                                           

Dende la confederación Intersindical y SUATEA, queremos amosar el refugu dafechu a la propuesta presentada pol Ministeriu d’Alministraciones Públiques na Mesa Xeneral de Función Pública celebrada’l día 24 de mayu, que pretende modificar el EBEP nel sentíu de torgar que’l personal interino pueda tar contratao nesta situación más de trés años.

Consideramos qu’esta midida ye un auténticu despropósitu porque de facto puede suponer el despidu de cientos de miles de trabayadores del sector públicu que tuvieron contrataos en fraude de Llei poles AAPP y, amás, pretenden faelo ensin garantizar nengún derechu, ensin nengún tipu de compensación nin indemnización. Supón un aprobiu total que sían les Alministraciones Públiques quien traten peor a los sos emplegaos y emplegaes, quien proponen precarizar, emplegar y despidir al so antoxu y dexar a les persones afectaes na más absoluta indefensión. Ye una falta que vaigan muncho más allá en retayos de derechos llaborales que lo que marca’l mesmu Estatutu de los/les trabayadores y la desfamada y dañible Reforma Llaboral del Partíu Popular.

Tamién ye un agraviu’l papel que tán xugando los sindicatos mayoritarios CCOO, UXT y CSIF, que dexen nel más absolutu desamparu y desprotección a más de 800.000 emplegaos y emplegaes públicos. Ye difícil entender qué motivos pueden aducir pa dexar abandonáu al personal n’abusu de temporalidá y pa torgar que’l personal público de nueva incorporación adquiera derechos. Les Alministraciones Públiques, en cuenta de cumplir la llei, caltuvieron a esti personal nos sos puestos mientres años y, en munchos casos, décades, torgando o amenorgando la so capacidá pa optar a la condición de personal funcionario por aciu la convocatoria de los correspondientes procesos selectivos, tal como esixe l’artículu 10.4 del EBEP. Esti personal, ensin dulda, ye la víctima d’estes práctiques fraudulentes y en nenguna manera responsable d’esta situación.

EBEP Remendado

Si la propuesta sigue alantre, significa que dan el llombu a la Directiva Europea 1999/70, a la sentencia de 19 de marzu de 2020 del Tribunal de Xusticia de la Unión Europea y a les llamaes d’atención de la Unión Europa. Siguen cola so fueya de ruta yá empecipiada colos “acuerdazos” del 2017 y 2018, roblaos pol gobiernu del PP y les direcciones de CC.OO., UXT y CSIF, que nun valieron más que pa precarizar más al emplegáu n’abusu de temporalidá o pal so despidu dempués d’años de servicios nes Alministraciones. Cesar al personal interino a los trés años d’ocupar una plaza ye una idea del Partíu Popular. Cristóbal Montoro yá intentó modificar el EBEP d’una manera indirecta al traviés de la Llei Xeneral de Presupuestos. Nesa ocasión, PSOE, Podemos ya IX opunxéronse, asina que ye difícil entender les razones que lleven agora a los socios del gobiernu progresista a emular al conservador PP.

Por si fore poco, con esta midida, van favorecer el deterioru y l’esmantelamientu de los servicios públicos. D’una parte, va facer de menos la esperiencia nel puestu al despidir al personal a los trés años; d’otra, si lo que proponen ye qu’una plaza cubierta de forma interina nun se puede cubrir mientres un añu una vegada cesada la persona interina, va asoceder que’l personal funcionario tendrá d’asumir les funciones de la persona cesada.

El sábadu 22 de mayu tuvimos en Madrid manifestando’l nuesu refugu a les midíes propuestes y esixendo la #FijezaYa de tol personal n’abusu de temporalidá. Por responsabilidá coles persones afectaes y col sector públicu polo xeneral, vamos siguir alzando la voz y, ensin dulda, la llucha va siguir.

27 de mayu de 2021
Secretariáu de la Confederación Intersindical y SUATEA

Print Friendly, PDF & Email

Esta entrada está disponible en: Castellano (Castellanu)