Home > Comunicaos > Contra la esplotación sexual

Contra la esplotación sexual

Esplotacion sexual

Contra la esplotación sexual

LA ORGANIZACIÓN DE MUYERES DE LA CONFEDERACIÓN INTERSINDICAL CONTRA LA ESPLOTACIÓN SEXUAL.

Tolos díes viéndense millones de muyeres y menores nel mundu, según datos de la ONU, que diz tamién qu’ente 4 y 5 millones de persones son víctimes de trata y el 80% pa esplotación sexual, ye dicir, pa matrimonios, prostitución y pornografía, forzaos nos 3 casos. N’Europa, cerca de 900.000 persones son víctimes de trata pa esplotación sexual y llaboral, anque más pa lo primero. Y nun se conocen la mayoría de los casos.
La esplotación sexual tien xéneru femenín, ya que’l 90% de les víctimes son muyeres y neñes. Esti negociu sigue suponiendo una fonte d’ingresos pergrande pa los esplotadores, mafiosos y proxenetes que se llucren robando la vida de les muyeres y les neñes esplotaes. Calcúlase que ye’l segundu o tercer negociu que más dineru xenera, al llau del tráficu d’armes y el de drogues. La esplotación sexual mueve ente 5 y 7 billones de dólares al añu a nivel mundial y alredor de 3 billones a nivel européu.
No tocante al Estáu español, con esti negociu faense 5 millones d’euros cada día. Nun hai datos nin cifres fiables del númberu de muyeres y neñes víctimes d’esta barbarie, porque les estadístiques afítense namás nos datos qu’aporten les ONGs que trabayen nesta xera o nos informes fechos coles intervenciones policiales. D’estes fontes sáquense les estadístiques actuales qu’asitien ente 45.000 y 50.000 muyeres víctimes de trata.
Una cifra ridícula al llau de la realidá na que vemos bares y clubes, carreteres, polígonos y la rodiada de les ciudaes enllenes de muyeres -bien d’elles tovía neñes- sometíes a esta esclavitú énte la mirada impasible de la sociedá. Muyeres y neñes que -amás de tar esclavizaes brutalmente- tienen qu’aguantar la estigmatización por ser prostitutes.
La probeza, los conflictos bélicos, les desigualdaees sociales y especialmente les de xéneru,too fai por esta explotación, xunto cola medría de la que llamen “industria del sexu” y de la demanda cada vez mayor de “servicios sexuales”. Les redes d’esplotación sexual aprovechen la falta de normativa sancionadora en dellos países pa trayer a les sos víctimes y entamar a esplotales de forma segura, ensin riesgu. Asina, cáptenles nos sos países d’orixe, engañaes, secuestraes y amenazaes de muerte elles y la so familia. Y si la policía desarma una rede de tráficu, les más de les veces les víctimesacaben trataes como inmigrantes illegales.
En comparanza col tamañu del problema, contrasten les cifres de les intervenciones policiales. Dende que s’entamó col Plan contra la Trata de Seres Humanos cola Fin d’Esplotación Sexual, fixéronse 462 operaciones qu’acabaron con 1.450 detenidos y 11.751 víctimes potenciales detectaes y incautáronse 29 millones d’euros meses, too eso hasta’l mes d’avientu del añu pasáu.
Na organización de Muyeres de la Confederación Intersindical refugamos dafechu la esplotación sexual, una esclavitú terrible que carecen millones de muyeres y menores, poro
MANIFESTAMOS:
– Que ye responsabilidá de los gobiernos acabar cola esplotación sexual, afitando les midíes estatales y afalando a los organismos internacionales pa coordinar les aiciones llexislatives, punitivas y asistenciales que faigan falta.
– Siguimos apostando y reivindicando la educación afectivu sexual afincada nel respetu a la diversidá de les persones y de les orientaciones y identidaes de xéneru.
– Esiximos el desenvolvimientu normativu y l’abonda dotación presupuestaria pa llevalo a términu.
– Pidimos a los gobiernos qu’aperien les midíes precises pa persiguir les mafies y los proxenetes, cola confiscación de toles ganancias feches con esta esclavitú pa devolveles n’atención y asistencia a les víctimes d’esplotación sexual.
– Queremos la protección, l’asistencia y la reiserción social de toles víctimes, ensin estremar orixe nin raza nin supeditar l’atención a si hai o non denuncia interpuesta.

Cuidamos que la esplotación sexual ye una más de les violencies contra les muyeres, polo que la Organización de Muyeres de la Confederación Intersindical axúntase a la convocatoria de la Marcha Estatal del 7 de payares Contra les Violencies Machistes y fai un llamáu a la sociedá pa participar nella.

Madrid, 23 de setiembre de 2015
ORGANIZACIÓN MUYERES

Esta entrada tamién se puede consultar en: Castellanu