Home > Aición sindical > Conseyeru d’Educación a la gueta titular de prensa

Conseyeru d’Educación a la gueta titular de prensa

L’aniciu de cursu 2018-2019 vieno marcáu pol reentamu  la reivindicación de la devolución de los derechos llaborales arrebataos al personal docente cola sida de la crisis económica. En cursos anteriores, les movilizaciones de la campaña pola reclamación de les hores lectives, 18 en Secundaria y 23 en Primaria, fueron constantes. Convién insistir en que’l profesoráu nun ta reclamando dengún tipu de privilexu. A cencielles pide volver a les condiciones de trabayu anteriores a la crisis. Nestos años  la Conseyería de Cultura escudóse siempres nel cumplimientu estrictu de la llei ensin amosar el menor interés por buscar dalguna vía alternativa que dexara amortiguar l’impactu de los recortes nes nueses condiciones llaborales, actitú que contrasta cola adoptada en delles otres Comunidaes Autónomes onde sí se buscaron alcuerdos parciales nesti sentíu.

Esta selmana, la Conseyería d’Educación convocó una Mesa Sectorial d’Educación pa presentar una propuesta que plantega l’amenorgamientu d’una hora llectiva pal próximu cursu 2019-20 y otra pal cursu 2020-21, ensin nengún tipu de midida compensatoria pal profesoráu d’enseñanza Primaria. SUATEA y el restu de fuerces sindicales refuguemos dafechu esta propuesta polo que la Conseyería se comprometió a una segunda xunta pa la próxima selmana.

Güei, na apertura oficial del cursu 2018-19 en Secundaria, el Sr. Conseyeru, Genaro Alonso, desmintióse a sí mesmu anunciando la so disposición a devolver les 18 hores lectives pal próximu cursu 2019-2020. Paeznos difícil creer qu’en menos de venticuatro hores la Conseyería d’Educación pudiera camudar de posición de forma diametral. Creemos más bien, qu’esti anunciu forma parte d’una política de marketing que busca un titular de prensa.

Dende SUATEA queremos señalar lo siguiente:

1º.- Les grandes decisiones deberíen d’anunciase nel llugar correspondiente que ye la Mesa Sectorial y non en declaraciones a los medios de comunicación buscando una repercusión mediática.

1º.- La reivindicación de la recuperación de los  derechos llaborales ye daqué que va muncho más allá que la devolución de les hores llectives. A la recuperación de les 18 hores en Secundaria debiera d’incorporase la voluntá d’aplicar un amenorgamientu asemeyáu en Primaria.

2º.- Nestos estos cursos pasaos, la Conseyería evitó cualquier tipu de negociación qu’afectara a otros aspeutos. Asina, nun pudo falase de ratios (escandaloses en Bachilleratu), nin de midíes qu’afectaren al personal docente con más de 55 años, al cumplimientu de plantiyes en Primaria, etc. Al nun esistir nengún alcuerdu parcial previu, la Conseyería señala agora l’impactu económicu de la midida y les dificultaes que tien qu’encarar p’aplicala.

SUATEA va allegase a la próxima Mesa Sectorial para plantegar lo que yá diximos na anterior d’esta selmana. La recuperación de les hores llectives y tamién l’adopción de midíes que dexen revertir los retayos aplicaos nos últimos años, que llevaron a la escuela pública a una situación de precariedá ya incertidume desconocíes enantes.

Uviéu 14   de setiembre de 2018

Esta entrada tamién se puede consultar en: Castellanu