Conseyería d’Educación: La máquina d’estrumir

Esta entrada está disponible en: Castellano (Castellanu)

SUATEA denuncia qu’esta selmana va haber un retayu más.

La Conseyería d’Educación, ensin previu avisu, tomó la decisión unillateral de nun realizar convocatoria de profesoráu interín esta selmana, posiblemente por ser festivu’l 12 d’ochobre. Llevamos un mes col cursu empezáu y nesti momentu hai munchos centros educativos que se quexen por falta de personal dende l’entamu de cursu afectando esti aspeutu tanto a profesoráu como personal non docente. Siguimos con una práctica na que s’entemez la ineficacia, el retrasu na segunda convocatoria, la ufierta de medies xornaes en centros alloñaos que resulten económicamente inasumibles pal profesoráu y unos criterios descomanadamente restrictivos na dotación de personal per parte de la Conseyería d’Educación. Too ello lleva a los centros a la desorganización y a tener qu’arbitrar midíes estraordinaries como reagrupar al alumnáu, medría de les guardies, etc. lo que da como resultáu perder apoyos o posibles desdobles, elementos clave na atención a la diversidá.

A too ello súmase agora la falta de convocatoria de profesoráu interín esta selmana, colo que nun se van cubrir les sustituciones hasta últimos d’ochobre. El fechu de qu’haya un festivu nuna selmana de nenguna manera puede significar una xustificación pa que los centros queden ensin el profesoráu que-yos correspuende.

En xunta celebrada la pasada selmana coles OOSS plantegóse-yos que nun pueden aplicar estos criterios tan restrictivos y que dende los centros hai munches quexes por falta de personal. Pero la Conseyería prefirió nun oyer estos pidimientos y dexar al alumnáu de tolos niveles (Primaria, Secundaria, Bachilleratu, Formación Profesional…) ensin clases y al profesoráu interín ensin la posibilidá de trabayar.

Consideramos impresentables estes práctiques. La Conseyería funciona como una máquina d’estrumir al máximu. Per un llau “esgatuña” una selmana del sueldu del profesoráu interín, y per otru nun se tienen en cuenta los derechos quitaos al alumnáu, y tamién, de recibir les clases con normalidá.

SUATEA esixi una rectificación d’esti tipu de polítiques, que nun son más qu’una amuesa de los retayos educativos que practica esta Conseyería, y que se dea cobertoria inmediata de les necesidaes de los centros educativos.

Uviéu, 12 d’ochobre de 2017

Print Friendly, PDF & Email

Esta entrada está disponible en: Castellano (Castellanu)