Conclusiones énte l’entamu les clases n’infantil y Primaria

CONCLUSIONES ÉNTE L’ENTAMU DE LES CLASES N’INFANTIL Y PRIMARIA.

Esta selmana empecipióse la torna de l’actividá escolar n’Asturies. Una vuelta en diferío yá que al ser la última comunidá autónoma en retomar l’actividá escolar, bona parte de los problemes y esmoliciones yá se plantegaron n’otres comunidaes y fueron focu d’atención mediática. Dende’l sindicatu SUATEA vimos el retrasu nel entamu del cursu escolar como una oportunidá pa que Conseyería d’Educación y Gobiernu asturianu s’implicaren nel resolvimientu de los problemes práuticos que se veníen denunciando tanto dende los equipos directivos de los centros como dende’l mundu sindical.

Sicasí, les coses nun se tán faciendo bien nestos díes cruciales.  La xustificación de retrasar el cursu “pa que’l profesoráu pudiera facese les pruebes PCR”  contribuyó a culpabilizar al profesoráu d’esti retrasu, en llugar d’asumir dende l’Alministración que faltaben instrucciones concretes y personal pa garantizar la vuelta a l’actividá escolar coles mayores garantíes sanitaries posibles.

Nestos primeros díes de cursu, dende SUATEA reparemos en que bona parte de les alvertencies y denuncies previes que venimos faciendo, siguen ensin resolvese. Asina, dellos colexos de distintos conceyos tuvieron denunciando nos díes previos les faltes de servicios como llimpieza o conserxería nos centros. En dellos casos, como’l CP El Bosquín de L’Entregu el refuerzu de llimpieza llegó’l mesmu día que s’incorporaba l’alumnáu a clase. Hai tamién necesidaes de personal de conserxería, que dellos centros denuncien que lo perdieron dende’l momentu del confinamientu.  N’otros, como por casu en dellos de Llanes, a falta de personal de llimpieza pa cumplir coles normes d’hixene que dicta la mesma Conseyería fueron families y docentes quien tuvieron que poner les instalaciones al día.

Aportunemos en munches ocasiones nel trabayu escomanáu que n’estos meses vienen desenvolviendo los equipos directivos, con instrucciones poco precises y contraordes.  Esto agrávase especialmente naquellos centros de Primaria ya Infantil que cunten con una directiva unipersonal. Nestos casos, les dificultaes son mayores tovía porque  a les actividaes habituales, yá escesives, súmase agora la previsión de midíes específiques pa encarar la crisis sanitaria y la so aplicación práctica, lo qu’enche les sos posibilidaes y responsabilidaes.

La próxima selmana va producise la reincorporación  del alumnáu de Secundaria y Bachilleratu. Otra vuelta vamos asistir a situaciones complicaes énte les que se dexa albentestate al profesoráu y los equipos directivos.  Vien denunciándose dende diversos Institutos del centru xeográficu asturianu les dificultaes  pa la distribución d’espacios y ellaboración de los horarios teniendo en cuenta que pola aplicación de los planes de continxencia, tán ampliándose grupos, pero non les plantiyes de manera proporcional. Nun se cubren los amenorgamientos de xornada concedíos. N’otros casos, falta personal indispensable pa completar plantiya, con especial gravedá en Primaria ya Infantil onde siguen precisando completar la plantiya del centru p’asignar les tutoríes.

Denunciamos la esistencia de retayos de personal qu’afecta, en munchos casos, a l’atención a la diversidá, elementu clave nel nuesu sistema educativu pa garantizar  una enseñanza calidable.

SUATEA aportunó énte la Conseyería en que les hores complementaries que van surdir de resultes del cambéu del tiempu de clase a 45 minutos, deberíen de convertise n’hores non presenciales pal profesoráu, cuidao que les instalaciones y los recursos en bona parte de los centros nun dexen el trabayu de preparación de materiales por falta d’espacios y d’ordenadores, falta del anchu de banda necesariu pa poder realizar delles conexones , etc.

Otru asuntu que va xenerar problemes ye’l de la semipresencialidad del alumnáu de 2º de Bachilleratu, que llega con falta de conocencies del pasáu cursu y agora atópase con un amenorgamientu real de les sos hores de clase. Sabemos de centros nos que los sos equipos directivos tán intentando por tolos medios qu’esti nivel sía presencial, pero los datos indiquen que va haber que facer frente a una situación complexa con desigualdaes ente alumnáu según asista a centros urbanos y rurales, centros más o menos masificados o con más o menos espacios disponibles.

Como yá anunciemos en delles ocasiones, dende SUATEA pensamos que va ser el voluntarismu y la profesionalidá del nuesu profesoráu quien encare otra vuelta la busca de soluciones a los distintos problemes que se van dir plantegando nos primeros díes de cursu.

                                                                                         Uviéu, 24 de setiembre 2020