Conceyu con Eva Ledo: Profesoráu asociao, formación y promoción profesional

El pasáu xueves 2 de febreru, SUATEA aconceyó cola Directora xeneral de personal docente, Dª Eva Ledo. Dicha xunta, convocada a iniciativa del nuesu sindicatu, tenía como finalidá tratar dos asuntos:

1. Situación del profesoráu d’enseñances non universitaries qu’exerz como profesor acomuñáu na Universidá d’Uviéu.
2. Aplicación del artículu 103 de LOE/LOMLOE.

Sobro’l primer puntu, recordamos a la Directora que na actualidá hai dellos profesores d’enseñances non universitaries compatibilizando’l so puestu col de profesor asociáu na Universidá d’Uviéu, pero, amás, hai delles places de profesor asociáu que’l so perfil ta empobináu básicamente a esti tipu de profesionales (por exemplu, les de didáctiques específiques). Pensamos que l’actual sistema de compatibilidaes nun ye’l fayadizu, pos xenera arbitrariedaes, y tien cuestiones de difícil encaxe llegal.

Consideramos qu’habría que facer un protocolu ente la Universidá d’Uviéu y la Conseyería d’Educación que:

a) Perfile afayaizamente les places de profesor asociáu compatibles cola docencia non universitaria y

b) Estableza un reglamentu universal y garantista nel qu’estos profesionales puedan desenvolver el so doble llabor ensin arbitrariedaes.

Sobro’l segundu puntu, tenemos qu’esclariar que la LOE, nel so artículu 103 establez lo siguiente:

«Las Administraciones educativas planificarán las actividades de formación del profesorado, garantizarán una oferta diversificada y gratuita de estas actividades y establecerán las medidas oportunas para favorecer la participación del profesorado en ellas. Asimismo, les corresponde facilitar el acceso de los profesores a titulaciones que permitan la movilidad entre las distintas enseñanzas, incluidas las universitarias, mediante los acuerdos oportunos con las universidades. »

Esto ye, la Llei establez claramente que si un profesor de primaria quier pasar a secundaria, FP, o EOI, la Conseyería tien que facilita-y l’accesu a la titulación necesaria. Dende SUATEA entendemos que facilitar nun ye a cencielles permitir. Naide puede prohibir a un profesor matriculase na Universidá, pero eso nun ye facilitar. Entendemos que pal profesoráu nesa situación la Conseyería tien qu’ufiertar un modelu de flexibilidá horaria (amenorgamientu de xornada), amás d’un protocolu coles universidaes que tenemos n’Asturies (Uniovi y UNED) que permita la realización d’esos estudios.

Per otru llau, si’l casu fuera’l d’un profesor que quixera pasar a la Universidá, la formación que riquiría sería’l títulu de doctor, pero tamién otros aspeutos necesarios pa llograr la acreditación na ANECA: investigación científica y docencia universitaria. Nesti sentíu, tamién habría qu’establecer un protocolu cola Universidá que dexe al profesoráu

a) cursar los estudios de doctoráu y

b) una vegada algamáu’l títulu de doctor, compatibilizar el so llabor docente na etapa non universitaria con llabor docente ya investigadora na Universidá, de cuenta que pueda consiguir la acreditación de la ANECA.

A lo último, recordamos qu’en Asturies esistieron les llicencies por estudios remuneres,que s’esaniciaron mientres la crisis económica de 2008, aludiendo al altu déficit (cimeru al 10%) y la falta de recursos públicos. Anguaño, cola enorme recaldación del estao vía IVA (de resultes de la inflación) y un déficit inferior al 2% y baxando, nun s’entiende que nun se recuperen los derechos llaborales perdíos.