Concentración contra la LOMCE y los recortes

SUATEA convoca pal miércoles 22 d’ochobre una concentración contra la LOMCE y los recortes educativos delantre de la Xunta Xeneral d’Uviéu, en comuña coles centrales sindicales de CCOO y FETE-UGT, asina como cola Federación d’Asociaciones de Padres d’Asturies ‘Miguel Virgós’ (FAPA).

La Conseyería d’Educación asina como’l gobiernu asturianu tienen la responsabilidá d’amenorgar les mancadures que la LOMCE ta inflixendo al enseñu públicu asturianu, activando les midíes que la llei-y permite. Sicasí, el gobiernu asturianu nun muestra l’enfotu que debería nello, tal y como demostró cola creación del consorciu pa xestionar les escueles de 0-3 años, abriendo la puerta a la privatización de la educación, siguiendo’l camín marcáu pol gobiernu de Rajoy na LOMCE.

La Conseyería d’Educación y el gobiernu d’Asturies tienen na so mano cortar coles dinámiques qu’emanen de Madrid:

• Meyorando les condiciones llaborales del profesoráu que vien sofriendo nos últimos años un aumentu significativu del so horariu llectivu.
• Aumentando’l númberu de docentes nos centros educativos, lo que permitiría aumentar los apoyos educativos y el mantenimientu de dellos programes agora abandonaos por falta de personal pa llevalos a cabu.
• Reduciendo’l númberu d’alumnáu per aula, permitiendo una mayor individualización nel procesu d’enseñanza-aprendizaxe.

SUATEA anima a la so afiliación, simpatizantes, y a la comunidá educativa en xeneral a participar d’esta movilización, asina como a informar y permitir al estudiantáu exercer el so derechu a fuelga dientro de la convocatoria que tien pa estos díes el Sindicatu d’Estudiantes.

Descargar cartel convocatoria [PDF 5’3mb]