Comunicáu solidariu cola CUT de Colombia y les organizaciones sociales

Xixón, 26 de xineru/22

Organizaciones d’Asturies refugamos les amenaces, los atentaos y los asesinatos escontra la Central Unitaria de Trabayadores de Colombia, CUT y escontra’l movimientu social.

Conocemos les agresiones que vien sufriendo dende va décades el movimientu sindical colombianu y de manera especial l’afiliación y la dirigencia de la CUT de Colombia y otres organizaciones sociales.

Y conocimos esta selmana les amenaces de grupos paramilitares que declaren como oxetivu militar a delles persones de la dirección de CUT: al presidente FRANCISCO MALTÉS TELLO; al Director del Departamentu de Derechos Humanos de la CUT Valle, WILSON SÁENZ; a l’abogada MYRIAM NIETO; amenaces que se suman a les que recibieron el exdirigente GILBERTO PAREJA, la Secretaria d’Organización y Educación Sindical de la Federación Colombiana d’Educadores, FECODE, ISABEL OLAYA; el Secretariu de Derechos Humanos de Sintraunicol/CUT, JOSÉ MILCIADES SÁNCHEZ, y el Director del Departamentu d’Organización de la CUT HUBER DE JESÚS BALLESTEROS.

Y enterámonos con horror del atentáu con coche bomba del pasáu 19 de xineru na ciudá de Saravena, que mató a una persona y mancó a cinco más y afectó la sede de la CUT Arauca, compartida coles Organizaciones Sociales del Centru – Empobine, incluyíes organizaciones llabradores y l’Escuela de Derechos Humanos Joel Sierra.

Rexistramos con dolor l’asesinatu de ALBEIRO CAMAYO, ex-coordinador de la Guardia Indíxena del Cauca, los asesinatos d’otros comuñeros de los pueblos indíxenes, y l’asesinatu -no corrío de xineru- de 13 persones de la dirixencia social colombiana.

Condergamos estes agresiones impunes, agravaes por ser un periodu pre-electoral, ataques que revisten el calter de sistemáticos, y esiximos del gobiernu colombianu presidíu por IVAN DUQUE MARQUEZ, les garantíes pa l’exerciciu de les llibertaes fundamentales, la protección efectiva de la vida y de la integridá de la dirixencia sindical y social colombiana sometida al xenocidiu y a la impunidá.

Espresamos a la CUT de Colombia, a les organizaciones sociales del país, a les víctimes y a los sos familiares, la nuesa voz solidaria frente a la barbarie.

Roblen:

Asociación Asturiana de Solidaridad con el Pueblo Saharaui

Asociación Bartolomé de las Casas

Asociación Paz y Solidaridad de CCOO de Asturias

Colectivo de Colombianos-as Refugiados en Asturias “Luciano Romero Molina”

Comisiones Obreras de Asturias, CCOO

Comité de Solidaridad con América Latina COSAL Xixón

Comité de Solidaridad con América Latina, COSAL

Comité de Solidaridad con la Causa Árabe, CSCA

Corriente Sindical de Izquierda, CSI

Ecoloxistes n’Aición d’Asturies

Ingeniería Sin Fronteras Asturias, ISFA

Pueblo y Dignidad

Sindicatu Unitariu y Autónomu de Trabayadores de la Enseñanza d’Asturies, SUATEA

Soldepaz Pachakuti