Comunicáu sobre’l11 de febreru: día de la muyer y la neña na ciencia.

Dicía Alexandra Kollontai (1872-1952) que “el saber de les antepasaes de les nueses madres yéra-yos ayenu a los sos compañeros que salíen de cutiu de caza o a la guerra o se consagraben a otres actividaes qu’esixen fuerces musculares particulares. Nun teníen tiempu para dedicase a la reflexón o a la observación sollerte”. Probablemente fora por eso polo que les muyeres fueron les primeres científiques de la humanidá al dedicase a la observación y el razonamientu.

Güei día vivimos cola imperiosa necesidá de protexer esti planeta nel que vivimos y asegurar un futuru cada vez más escuru no tocante a probeza y crisis medioambiental. Nesti puntu tamos implicaes toes y cada una de les persones que lu habitamos, ensin esceición dalguna. Sí, tamién la muyer, neña o adulta. Porque p’algamar esti oxetivu, la igualdá de xéneru y la Ciencia van de la mano y son vitales pa esti fin.

Son yá seis años dednde que l’Asamblea Xeneral de les Naciones Xuníes decidiera proclamar el 11 de febreru como’l Día Internacional de la Muyer y la Neña na Ciencia. Seis años nos que se reivindica a dambes como axentes esenciales de cambéu y, pa ello, ye primordial reconocer el so papel como tales. Pero atopamonos con un sentimientu d’inferioridá ya incompetencia qu’atañe a la muyer como científica. P’apinar esti sentir, atribúyese-y de forma consciente o inconsciente una responsabilidá de la situación a la mesma muyer con afirmaciones contundentes del tipu “si nun hai más muyeres en cargos d’importancia ye porque nun quieren”. Sicasí ye la sociedá, la educación, los medios de comunicación, quien dexen de favorecer la promoción de les muyeres. Dende que nacemos, dependiendo del xéneru que se mos atribuya, condiciónasenos para cumplir con un rol específicu. Y el rol de la muyer suel ser el de cuidadora, d’ehí que, en munchos casos, la muyer tenga más difícil a la d’algamar puestos de responsabilidá o, a cenciellamente, estudiar carreres qu’esixen más dedicación qu’otres.

Los medios, nesti sentíu, son de suma importancia a la de moldiar la opinión popular. En tiempos de COVID apaecen nellos más científicos y especialistes masculinos que femeninos. Esa falta de visibilización de la muyer como esperta científica trai una serie de consecuencies tales como’l llogru d’una reconocencia llindada o, a cencielles, la de dexar de ser un referente tan necesariu para les neñes.

La nuesa sociedá, al traviés de la cultura y los medios de comunicación, ta manipoliada polos grupos de poder que, subrepticiamente, indúcennos a aceptar los sos principios como válidos y ente ellos sigue’l conceutu de muyer como cuidadora.

Hipatia d’Alexandría, Augusta Ada Byron (Condesa de Lovelace), Marie Curie, Rosalind Franklin o Jane Goodall, podríen considerase afortunaes porque los sos nomes resonen yá nel bagaxe cultural de munches persones gracies a les reivindicaciones feministes. Pero hai que siguir porque, como afirmaba Virginia Woolf, “Na mayor parte de la hestoria, anónimu yera una muyer”. Hai que siguir por que Margarita Salas, María Blasco, Montserrat Caleya, Rosa Menéndez, Alicia Calderón, Gabriela Morreata o Elena García Armada, y otres tantes y tantes muyeres dedicaes a la Ciencia, nesti país o en cualesquier otru, nun sigan a la solombra. Hai que siguir por que les neñes vean n’elles un exemplu a siguir, el so referente, la so inspiración.

Sigamos, pos, porque la Ciencia ye pa toos…y TOES.