Home > Comunicaos > Comunicáu sobre’l cambéu nel sistema de ellaboración de llistes d’interinidá

Comunicáu sobre’l cambéu nel sistema de ellaboración de llistes d’interinidá

LA PROPUESTA DE REORDENACIÓN DE LLISTES DE PROFESORÁU INTERÍN CONVERTIRÁ ASTURIES NA PEOR COMUNIDÁ AUTÓNOMA PA SER INTERÍN

SUATEA CONVOCA ASAMBLEA DEL PROFESORÁU INTERÍN NEL IES ARAMO D’UVIÉU EL MIERCOLES 12 A LES 18:30

Esti xueves va celebrase una nueva Mesa Sectorial d’Educación na que la Conseyería pretende facer ún de los mayores despropósitos en materia educativa na nuestra comunidá, siguiendo llamentablemente los pasos de la Conseyera d’Educación de Madrid, y la tan desfamada pol mesmu PSOE, Lucía Figar.

L’aberración de la nuestra Conseyera Ana González afecta nuevamente al profesoráu interín asturianu, una más a añedir a unes polítiques de falta de negociación coles organizaciones sindicales, d’amortización de puestos y eliminación d’unidaes educatives qu’acaba de ser puesta en tela de xuiciu por tolos grupos de la Xunta Xeneral del Principáu.
La convocatoria d’oposiciones pa esti cursu, refugada por SUATEA y el restu de sindicatos, llevaba amás un regalu envelenáu pa los docentes interinos: un cambéu nos criterios de formación de les llistes que va suponer el despidu pa centenares d’ellos si l’alcuerdu que propón la Conseyería llega a aplicase dacuando.

La propuesta contien un preámbulu nel que s’empondera’l trabayu del profesoráu interín. Pero esa afirmación vese compensada con una propuesta d’ellaboración de llistes que penaliza gravemente a les persones que lleven años trabayando n’Asturies.

Salvo delles CCAA nes que les llistes de profesoráu interín tán zarraes y ordenaes por rigorosu orde d’antigüedá (País Vascu, Isles Baleares, Cataluña, Andalucía y Galicia), los elementos qu’apurren puntuación pa tar incluyíos nes llistes tienen dos grandes apartaos na regulación que d’esti tema faen les distintes CCAA: son l’antigüedá y la nota d’oposición. A ellos hai qu’añedir otros apartaos que suelen cuntar menos como la Formación y l’Espediente Académicu, que se suelen valorar conxuntamente na mayoría de CCAA, y el trabayar en Puestos de desempeñu revesosu.
La distribución de les puntuaciones puede inclinar la balanza n’unu o otru sentíu. Pero a naide se-y escapa que’l desempeñar un puestu de trabayu per años apurre una cualificación p’acceder al empléu definitivamente en cualisquier ámbitu llaboral. Recordemos que la empresa privada tien que faer fixos a los sos trabayadores eventuales nel casu de contratación per más de tres año consecutivos.

L’antigüedá nel empléu interín ye por ello un componente esencial en tolos baremos p’acceder a les llistes d’interinos de tol Estáu, menos n’aquelles, como yá indicamos más arriba, nes que les sos llistes tán zarraes y a les qu’una persona procedente d’Asturies nun puede acceder, mientres que toos ellos puen presentase equí. Namás hai una comunidá na que la esperiencia docente ye fecha de menos: la comunidá de Madrid, onde se-y atribúi un porcentaxe risible ( el 15%)
Pos bien. ¿Qué modelu d’ellaboración de llistes utilizó la Conseyería asturiana? ¿Optaría por protexer al so profesoráu interín per mediu de llistes zarraes, como pasa n’otres Comunidaes, o incentivando la puntuación que se deriva de trabayar n’Asturies? ¿O pela cueta sigue los pasos de Lucía Figar y dexa apostráu’l criteriu d’antigüedá a un míseru 30%? Llamentablemente, la respuesta afirmativa ye pa la última entruga.

Esta ye la murnia realidá: non solo sigue los pasos de la Conseyería más retrógrada nel tratamientu del profesoráu interín y que provocó’l despidu de miles d’ellos, sinón qu’amás discrimina a quien nun se presentó a oposiciones, torga que s’utilicen les notes correspondientes a oposiciones anteriores al añu 2000 y a les algamaes cuando’l llamáu sistema del periodu transitoriu, un procedimientu puestu en marcha ente los años 2006 y 2010 pol gobiernu del PSOE. Esta prohibición nun esiste en nengún otru llugar en tol Estáu.

La verdadera razón d’esti despropósitu ye fundamentalmente económica: tratar d’espulsar de les llistes d’interinos a quien tienen antigüedá y cobren trienios y sexenios (por imperativu llegal, yá que nun cobralo suponía incumplir la normativa europea antidiscriminatoria). Una actitú indigna d’una Conseyería d’Educación que diz de forma hipócrita valorar a los sos docentes interinos.

SUATEA va desixir na Mesa Sectorial la retirada d’esti borrador por considerar qu’atenta contra los derechos de miles d’interinos asturianos y abandona cualisquier forma d’averase a la estabilidá nel empléu de les persones que güei tán incluyíes nes llistes asturianes, yá que de facese esta reordenación Asturies convertiríase na comunidá autónoma que pior trataría al so profesoráu interín.

XESTIÓN LLISTES NES DIFERENTES COMUNIDAES AUTÓNOMES

ORDENACIÓN DE LLISTES                                                                  BAREMU

 1.  Llistes zarraes y formaes por profesoráu interín ordenáu por rigurosu orde d’antigüedá o por fecha d’incorporación a les llistes: País Vascu, Cataluña, Galicia, Baleares y Andalucía. Les nueves incorporaciones regúlense de forma diferente en caúna d’elles.2.  Llistes zarraes y ordenaes conforme a baremu nel que se valora la esperiencia, la nota d’oposición y otros méritos: Aragón y Castiella-La Mancha. Les nueves incorporaciones regúlense de forma diferente.

3.  Llista preferente formada pol profesoráu interín n’activo y otra llista de secute que regula nueves incorporaciones (provinientes de la oposición, de nueves bolses, etc.): Cantabria, Aragón, País Valencianu y La Rioja.

4.  Llista única ordenada por baremu y que se renueven ca vez qu’hai procesu selectivo: Ceuta y Melilla, Castiella y Llión, Estremadura, Madrid, Canaries y Asturies.

 

 1.   Sólo se tien en cuenta la esperiencia docente como méritu y ensin llende en llista preferente: País Vascu, Cataluña, Galicia, Baleares y Andalucía.2.   Ordénense llistes por baremu teniendo en cuenta la esperiencia docente, la nota d’oposición y otros méritos. Varíen los tantos por cientu d’unes Comunidaes a otres, anque en delles dase más peso a la esperiencia previa y n’otres, a la nota d’oposición.- Esperiencia docente: Ceuta y Melilla (70%), Aragón (55%). Estremadura (47.5%), Canaries (40%), Castiella y Llión (55%), Castiella-La Mancha (40%), La Rioja (50%), Madrid (15%), Murcia (ensin llende), Cantabria (25%, sólo en llista non preferente).

N’Asturies, hasta la fecha, 50%; na nueva propuesta, 30%.

– Nota procesos selectivos: Ceuta y Melilla (40%), Aragón (20%), Estremadura (30%), Canaries (40%), Castiella y Llión (25%), Castiella-La Mancha (40%), La Rioja (30%). Madrid (80%), Cantabria (50%), Murcia y Navarra (n’entrambes, prima l’aprobáu na fase d’oposición y incorpórense otros méritos).

N’Asturies, hasta la fecha, 35%; na nueva propuesta, 50%.

Otros méritos (Expediente académicu y formación): Fluctúa ente un 10% y un 25%. N’Asturies, hasta la fecha, 15%; na nueva propuesta, 20%

 

CONCLUSIÓN: La nueva propuesta de l’Alministración asturiana devalúa los servicios emprestaos por miles de persones n’Asturies y  somételos a la perpetua rotación o al paru.

POR ESTO SUATEA CONVOCA ASAMBLEA DEL PROFESORÁU INTERÍN ESTI MIÉRCOLES, DÍA 12 A LES 18:30 HORES NEL IES ARAMO D’UVIÉU

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339