Comunicáu de la Xunta de Personal sobre “Ufierta d’Empléu Públicu”

Esta entrada está disponible en: Castellano (Castellanu)

opos masLa Xunta de Personal Docente non Universitariu d’Asturies desixe a la Conseyería d’Educación qu’esclarie darréu les sos intenciones sobre la convocatoria d’Ufierta d’Empléu Públicu.

La Conseyería d’Educación sigue ensin da-y respuesta a la futura ufierta d’empléu públicu depués de la non aprobación de los Presupuestos de la Comunidá Autónoma pal añu 2014.

Esta Xunta de personal manifiesta la so enorme inquietú, yá que nun se puede tener na máxima incertidume a miles de persones interines y de nueva titulación sobre la so situación futura, mientres se siguen produciendo retayos curiosos na contratación de profesoráu interín. Nesi sentíu, siguen ensin convocarse bolses de diferentes especialidaes, lo que ta provocando que l’alumnáu quede ensin profesoráu per meses, como ye’l casu de la bolsa d’Italianu y de diverses especialidaes d’enseñances artístiques, pola neglixencia de l’Alministración.

Pesi a que se denunciara una montonera d’ocasiones dende esta Xunta de Personal Docente, Asturies sigue siendo la Comunidá Autónoma cola media d’edá más alta y la tasa d’interinidá más alta de tol Estáu. Fai falta Ye necesario remocicar la plantiya docente per aciu d’una ufierta pública d’empléu qu’abarque’l 100 % de les vacantes existentes.
N’Asturies, el Gobiernu del Principáu mantuvo conxelada la ufierta pública d’empléu docente pelos dos últimos años; de forma tala que quedaron ensin reponer toles xubilaciones producíes d’entós p’acá, cuasi 1500 nos últimos tres cursos. Como consecuencia d’esta situación, aumentó la temporalidá de les plantiyes y de forma descomanada la precariedá pol abusu escesivu de les medies xornaes. A un tiempu amortizáronse vacantes enforma.
Nesti momentu, delles Comunidaes Autónomes yá anunciaron o bien una determinada ufierta d’empléu públicu o bien qu’esti cursu nun va haber dicha ufierta. El profesoráu interín asturianu sigue tovía ensin saber cuála va ser la decisión de la Conseyería.
Esta Xunta de Personal considera inalmisible dafechu la indefinición de la Conseyería d’Educación que caltien en fierros a miles de persones que desconocen güei si van convocase oposiciones n’enseñanza non universitaria.
Lo qu’esta Xunta de Personal consideraría como un insultu y una agresión a la enseñanza pública asturiana y a los sos docentes sería la convocatoria de 14 places coles que la Conseyera amenazó al colectivu nes sos intervenciones.
Ye inalmisible que puea llegase a plantegase nin siquier un segundu tala posibilidá. Por ello, esta Xunta de Personal desixe una respuesta inmediata a les xustes esmoliciones del profesoráu asturianu.

Uviéu, 9 de xineru de 2014

Print Friendly, PDF & Email

Esta entrada está disponible en: Castellano (Castellanu)