Home > Centros educativos > Comunicáu de la XP pola información publicada nun periódicu sobre l’entamu del próximu cursu

Comunicáu de la XP pola información publicada nun periódicu sobre l’entamu del próximu cursu

En relación cola noticia apaecida’l martes 2 de xunu, nun periódicu rexonal, col títulu “El próximu cursu va ser “catastróficu”, sobremanera na pública, sollerten les academies”, la Xunta de Personal Docente non Universitariu d’Asturies deseya realizar les siguientes considerancies:

1.   El profesoráu de la rede pública tuvo trabayando ensin fuelgu dende’l momentu de la suspensión de les clases presenciales pa garantizar una atención profesional y fayadizo a tol alumnáu, realizando, en xunto, miles d’hores estraordinaries non retribuides y colos sos recursos propios.

2.   Gracies a esti esfuerzu, embrívense les consecuencies negatives causaes pola interrupción de la enseñanza presencial, especialmente nel alumnáu más vulnerable.

3. La normativa rexonal aprobada pola Conseyería d’Educación estableció los mesmos requerimientos y condiciones de teletrabayu pa tolos centros educativos asturianos sosteníos con fondos públicos. Por esta razón, refugamos l’afirmación que se fai nel titular de que’l próximu cursu pueda ser “catastróficu” en mayor midida na rede pública que na rede alcordada.

4.  Les declaraciones de representantes d’academies -los cualos, per otra parte, son parte comenenciuda del asuntu que s’enceta- paécennos cuandoquier desafortunaes, máxime cuando se realicen, de xuru de forma intencional, xusto antes de los procesos de matriculación.

5.   La Xunta de Personal  Docente considera que la enseñanza pública apurrió una atención fayadiza conforme a les normes establecíes pola Alministración, acorde a les circunstancies escepcionales de la pandemia, al conxuntu del alumnáu y que’l cursu próximu va empecipiar con normalidá.

6.   La Xunta de Personal Docente non solo refuga de planu eses afirmaciones sinón que fai un llamamientu a la comunidá educativa asturiana por que siga comprometida cola defensa de los servicios públicos. Servicios que son de toos y pa toos. La escuela pública ye la única que puede garantizar la igualdá d’oportunidaes del alumnáu y l’imparcialidá nos sos conteníos, polo que quier, puede y tien de siguir cuntando col sofitu de tola sociedá.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344