Home > Comunicaos > SUATEA anuncia movilizaciones n’ochobre contra los retayos y la LOMCE

SUATEA anuncia movilizaciones n’ochobre contra los retayos y la LOMCE

COMUNICÁU DE SUATEA SOBRE L’ANICIU DE CURSU N’ASTURIES

SUATEA va proponer al profesoráu la convocatoria de movilizaciones nel mes d’ochobre escontra la LOMCE y los retayos.

 L’aniciu de cursu n’Asturies ta marcáu pola implantación de la LOMCE, los retayos na educación asturiana y un nuevu alcuerdu d’interinos que ta yá produciendo efectos nefastos ente esti profesoráu.

El cursu qu’entama agora fáilo de forma atípica: ponse la LOMCE n’Asturies nos cursos primeru, terceru y quintu de primaria y nos IES la llamada FP básica lo que va suponer un cambiu radical na organización de los centros.

Esta implantación fecha con tanta priesa por disexencia del ministru Wert trai como consecuencia que los centros educativos se vieren obligaos a tomar decisiones como’l mantenimientu de los ciclos – anque la LOMCE fáilos desapaecer- o la organización en bloques de tres cursos en concordancia coles reválides impuestes pola LOMCE, o como los horarios reservaos a cada materia.

Recordemos que pesie a que’l ministeriu d’Educación apurría a la materia de relixón y la so alternativa – toes dos evaluables- un horariu de 45 minutos, la Conseyera d’Educación decide n’Asturies ampliar esi horariu a una hora selmanal, daqué inaceptable dafechu pa SUATEA.

N’Asturies, la improvisación foi xeneralizada, non sólo porque tovía nun se publicara nel BOPA el nuevu currículu cuando’l día unu de setiembre empieza l’actividá nos centros, sinón tamién en materies como la xestión de beques de llibros y material escolar, actividaes estraescolares o la xestión de les obres y reformas nos centros educativos.

Retayos en plantiyes docentes y precarización del empléu.

La Conseyería d’Educación enfotóse yá l’otru cursu n’eliminar decenes de places nes plantiyes de los centros públicos asturianos. Esto supón que’l númberu de docentes estables de les escueles, IES y demás centros públicos ca vez ta más amenorgáu. Les xubilaciones – alredol de 500 nel últimu cursu- nun se cubren na so mayor parte con profesoráu estable. Eso apurre la posibilidá de qu’eses place puean o bien quedar ensin cubrir, o bien lo seyan con profesoráu interín, munches veces a media xornada. Por ello la Conseyería abusa d’esa fórmula y condena a la precariedá a centenes d’interinos y interines y a los centros a nun cuntar col profesoráu necesariu p’atender de forma amañosa la diversidá d’alumnáu.

Nel casu de secundaria y enseñances de réxime especial, la proliferación de medies xornaes pal cursu próximu perpasa’l 40%. Esto quier dicir en munchos casos que nun van atendese les demandes del alumnáu, que nun van garantizase los desdobles y los apoyos necesarios p’atender a la diversidá o que nun van ufrise les materies optatives que quieran, colo que la igualdá d’oportunidaes pal accesu a posteriores estudios universitarios o de FP vese condicionada.

El nuevu alcuerdu d’interinos

El profesoráu interín movilizóse l’otru curso en defensa de la so estabilidá, con un cientu de manifestaciones, concentraciones y asamblees. Esta llucha viose tarazada pola robla d’un alcuerdu ente dos organizaciones sindicales y la Conseyería d’Educación. SUATEA alertó de les consecuencies que diba traer esti nuevu documentu.

La reunión de la comisión de siguimientu fecha’l 22 de xunetu ente les partes firmantes –con un conteníu que permaneció ocultu pal profesoráu interín y pa les organizaciones que nun suscribimos l’alcuerdu- contribuyó a agravar les condiciones del mesmu, pues la interpretación de los aspectos ambiguos o non esplícitos foi restrictiva pal profesoráu. Llegaron a decidir ¡¡por unanimidá!! cuestiones como declarar la nota d’oposición nula (esto ye, 0 puntos na llista d’interinos) si parte dala de la primer prueba se saca una calificación inferior a 1’25.

Otru de los elementos más sangrinos ye la espulsión de docentes que se presentaron nel últimu procesu selectivu a otra especialidá distinta de la que taben integraos. Esta posibilidá, qu’hasta agora yera factible dafechu, niégase-yos cola máxima sanción: quedar fuera de lés llistes d’interinidá y polo tanto de la posibilidá de trabayar a partir d’esti momentu.

Por toes estes cuestiones, dende SUATEA creemos que les amenaces sobre la Escuela Pública que comporta la LOMCE, los retayos y la precarización del empléu xunta les deterioraes condiciones llaborales y salariales del conxuntu del profesoráu son elementos más qu’abondos pa movenos a proponer al profesoráu la convocatoria de movilizaciones en defensa de la escuela pública, contra l’aplicación de la LOMCE y contra los retayos qu’empezaríen el próximu ochobre.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339