COMUNICÁU: Sobro la suspensión de les formaciones esternes.

Esta entrada está disponible en: Castellano (Castellanu)

El pasáu vienres 20 de xineru, la Conseyería d’Educación unvió un e-mail a los centros educativos informándo-yos de que suspendíen toles formaciones esternes. Esto significa que toos aquellos cursos de formación en centros que rican d’un ponente que nun sía d’esi centru, suspéndense sine die, anque tean yá entamaos. Ye más, aquellos cursos de formación lligaos al desenvolvimientu d’un proyeutu queden tamién suspendíos, lo qu’implica que’l profesoráu va tener que decidir ente siguir el proyeutu ensin recibir la formación que precisa pa ello, o retardar (quiciabes suspender) un proyeutu de centru que, en munchos casos, ta adscritu a subvenciones de fondos europeos.

Dende SUATEA entendemos qu’esta decisión de la Conseyería ye inaceptable, pues xenera un gran perxuiciu a los centros al dexar nel aire la continuidá de proyeutos alredor de los cualos tán pivotando les enseñances que se programaron pal actual cursu. Díxose que la paralización respuende a una decisión de la Conseyería d’esaminar los requisitos necesarios pa impartir diches formaciones. Llama poderosamente l’atención que faigase esto agora, a metá de cursu y coles formaciones entamaes y los formadores yá escoyíos, en llugar de faelo antes d’entamar el cursu y d’escoyer a esos ponentes. El problema que mos llevó equí ye, por tanto, una mala organización per parte de la Conseyería, qu’agora tresllada a los centros, que se ven sumíos nun desorde qu’ellos nun provocaron.

Dende SUATEA pidimos qu’estes actuaciones formatives se reemprendan d’inmediatu, que los cambeos de criterios de la Conseyería nun afecten a la formación del profesoráu nin a la realización de proyectos anguaño n’execución y, cuantimenos, una esplicación de por qué lleven a cabu esta aición a estes altures del cursu, paralizando los proyeutos, en llugar de pensalo a tiempu.

Print Friendly, PDF & Email

Esta entrada está disponible en: Castellano (Castellanu)