Comunicáu del sindicalismu alternativu de clas sobro la estabilidá del personal n’abusu.

Los Sindicatos de Clas van siguir con movilizaciones, fuelgues y otres acciones reivindicatives nos distintos territorios hasta consiguir la estabilización rial del personal temporal n’abusu de les alministraciones públiques conforme a la directiva y xurisprudencia europea y piden a los partíos políticos responsabilidá y voluntá pa que la nueva llei pal amenorgamientu de la temporalidá s’adapte a les diretrices europees, evite la inseguridá xurídica y solucione definitivamente’l problema

Los sindicatos firmantes apostamos pola ESTABILIDÁ por aciu l’afitamientu del personal temporal n’abusu nos sos puestos, ensin dexar a naide atras, solución llegal que yá s’aplicó n’otros momentos y que dexa aprovechar la esperiencia llaboral de les victimas, y nun supón costu dalgunu pa les nueses menguaes arques públiques.

Estes enmiendes, nun cumplen pa nada colos principales oxetivos marcaos por esti colectivu magar que mientres son aprobaes pola correspondiente Comisión, Senáu y Congresu, suponen, eso sí, una pequeña meyora na direición entamada nos distintos ámbitos polos colectivos de trabayadores precarizaos y precarizaes nes Alministraciones Públiques dende va años. Amás, como yá dicíemos, el so anunciu/filtración nun dexa de suponer una maniobra de división y desmovilización d’esti colectivu, amás d’un intentu por avivar les posiciones más reaccionaries güei representaes per una bona parte de la xudicatura, pol sindicalismu institucionalizáu y pactista, por formaciones polítiques instalaes nel posibilismu y pol mesmu sistema, interesáu en caltener un ampliu destacamentu de trabayadores precarios nes Alministraciones Públiques llistes pa engordar les plantiyes de los nuevos nichos de negociu qu’a cada pasu surden de la incesante privatización de los servicios públicos.

Amás pidimos que los procesos selectivos non convocaos y los que publicaes les sos bases nun empecipiaren, tendrán d’afaese a la nueva llexislación.

Reconocer que’l concursu de méritos ye’l sistema llegal de provisión de places que tien d’aplicase pa solucionar el fraude nel sector públicu ye un cambéu d’actitú, insuficiente pero un pequeñu pasu. Ye necesario recordar qu’esta ferramienta contó cola firme oposición del sindicalismu mariellu de CCOO, UXT y CSIF que dieron el llombu a los intereses del personal temporal toos estos años. El concursu de méritos apaez como un procesu abiertu, non acutáu y polo tanto inciertu, polo que tendría d’acutase namá al personal en fraude de llei y como últimu recursu, anteponiendo la Fixeza como Sanción o la figura del Fixu a esaniciar.

Queremos insistir na necesidá de caltener la movilización porque va ser mientres esta fase de concreción del alcuerdu cuando tengamos que arimar el llombu pol afitamientu del personal interino, llaboral y estatutario pa qu’esa concreción sectorial se faiga siguiendo la fueya de ruta del afitamientu de quien lleva más de 3 años. Solo la llucha va consiguir torgar que s’impongan soluciones entemedies que nun resuelvan el problema como tien de faese según los parámetros europeos (Directiva EU 70/1999).

Poro, vamos siguir aportunando en que lo que pidimos ye lo más xusto y cenciello: treslladar al sector públicu lo que ye d’obligáu cumplimientu nel priváu en materia de contratación. Tamién queremos faer una reconocencia a tol personal que se vien movilizándose contra vientu y marea. Demostremos que les coses pueden camudar y que nun fueron esfuerzos en devanéu.

Agora, más que nunca tenemos de tar al tantu de la evolución de los próximos acontecimientos para reaccionar rápido si produxera cualesquier contratiempu.

Nesti sentíu suxurimos al personal afectáu tar sollertes de cualquier convocatoria que propongamos.

Pedimos:

• Afitamientu nel empléu de toles persones en situación d’interinidá o temporalidá abusiva nes Alministraciones Públiques acordies cola normativa europea.
• Cambeos normativos que faigan posible la estabilización que se reclama.
• Qu’el proyectu de llei de midíes urxentes pal amenorgamientu de la temporalidá nel empléu públicu transponga definitivamente la directiva 1999/70/CE al sector públicu ensin desvirtuar l’oxetu y finalidá de la mesma.
• Determinar les persones que s’atopen n’abusu de temporalidá nes Alministraciones y Empreses públiques y que nun se produza nengún cese de les mesmes hasta que s’establezan los mecanismos necesarios pal so afitamientu real.
• Los procesos selectivos non convocaos y los que publicaes les sos bases nun s’empecipiaren, tendrán d’afaese a la nueva llexislación.
• N’Enseñanza y Sanidá la Llei, tien que recoyese de forma esplícita la posibilidá de l’aplicación del concursu a les places ocupaes con contratos o nomamientos de calter temporal ensin interrupción y places estructurales con destín cambiante.
• Fomentar les Ufiertes d’Empléu Públicu de Reposición.
• Sanción a los responsables de la situación d’abusu de la temporalidá del personal interino y temporal.
• Potenciación y refuerzu de los Servicios Públicos.

Poro: la estabilidá tien de tar acordies a la norma europea, que realmente sancione l’abusu y que pase pola voluntá política real de resolver el problema

Descargar el comunicado en PDF.