Comunicación de SUATEA al profesoráu interín

Esta entrada está disponible en: Castellano (Castellanu)

Como sabéis, dende SUATEA convoquemos a lo llargo esti cursu movilizaciones de profesoráu interín coles mires d’echar embaxo l’Alcuerdu que regula’l sistema d’ellaboración y xestión de llistes d’interinidá, robláu por FETE-UXT y ANPE en 2014. SUATEA nun soscribió l’Alcuerdu porque teníamos el convencimientu de que diba xenerar inestabilidá, inseguridá y perda de derechos del profesoráu interín asturiano. Y, bien al nuesu pesar, asina asocedió en 2014 y 2015 y tenemos la seguridá de que va asoceder anguaño.

Por ello, en septiembre de 2015, SUATEA entrevistóse col nuevu Conseyeru pa espone-y los problemes ya inseguridaes que xenera l’Alcuerdu en vigor y, yá nesi momentu, plantegámos-y que yera urxente abrir la negociación d’un nuevu Alcuerdu qu’ameyorara l’anterior. Ante la falta de respuesta, dende SUATEA empezamos a trabayar n’otres instancies, tratando d’esplicar siempres por qué’l colectivu interín asturianu ta discrimináu respectu al d’otros territorios y por qué nun tamos pidiendo daqué imposible. Amás, convocamos movilizaciones del colectivu interín que se llevaron a cabu de forma siguida hasta’l mes de mayu. De toes estes movilizaciones y actuaciones llevaes a cabu per SUATEA, surdió la Proposición Non de LLEI (PNL) que se presentó’l 29 de febreru nel Parlamentu asturianu y que sofitaron tolos partíos políticos (PODEMOS, IX, PP, FORU y CIUDADANOS), toos menos el partíu del Gobiernu. La PNL encamentaba a la Conseyería d’Educación a axustar un nuevu Alcuerdu qu’entrara a valir pa les llistes resultantes de la convocatoria d’oposiciones de 2016 y qu’incluyera los siguientes criterios:

  • Prevalencia de la esperiencia docente frente a otros criterios.
  • Clauses específiques que garanticen la estabilidá del profesoráu interín mayor de 55 años.
  • Clauses específiques que garanticen el cumplimientu de los porcentaxes de profesoráu con discapacidá nes llistes de profesoráu interín.
  • Otorgar mayor puntuación a la esperiencia docente desenvuelta nel sistema educativu públicu asturianu.

El Conseyeru, a día de güei, nun fixo casu a les propuestes incluyíes na PNL y consiguió lo que pretendía: dexar que cuerra’l tiempu y desactivar les movilizaciones. Pela so parte, el Parlamentu asturianu, trescurríos los plazos llegales de l’aprobación de la PNL, tendrá d’esixir al Conseyeru que cumpla coles propuestes aprobaes.

 

Agora bien, sabemos que’l tiempu apremia y que tais preparando oposiciones, polo que nun podemos pidivos más implicación en movilizaciones que vos esvien de les vueses obligaciones. Per otra parte, comunicáronnos que se suspende l’actividá parlamentaria hasta dempués de les elecciones, lo cual llévanos al mes de xunetu. Ante esta tesitura, dende SUATEA prevemos que, bien al nuesu pesar, los partíos políticos van treslladar la esixencia de cumplimientu de la PNL a setiembre. Pela nuesa parte, consideramos más conveniente treslladar tamién les movilizaciones al mes de setiembre. Igual que vós, tenemos la seguridá de qu’un añu más van surdir ensame de problemes nes llistes y axudicaciones d’entamu de cursu y que, amás, va haber muncha xente víctima de l’aplicación d’esti aciagu Alcuerdu.

Por too ello, dende SUATEA, vamos convocar movilizaciones de profesoráu interín pal mes de setiembre en fecha por determinar. A día de güei y n’espera de posibles novedaes que surdan, los oxetivos d’estes movilizaciones van ser los siguientes:

–          Dar sofitu a quien resulten perxudicaos nes nueves llistes resultantes de los procesos selectivos d’anguaño. Naide puede dir al paru pola aplicación d’un Alcuerdu que lo único que busca ye la rotación y la precariedá nel empléu.

–          En cumplimientu de la PNL aprobada nel Parlamentu, esixir la negociación d’un Alcuerdu de profesoráu interín de forma inmediata.

 

Uviéu, a 1 de xunu de 2016

Print Friendly, PDF & Email

Esta entrada está disponible en: Castellano (Castellanu)