Home > Aición sindical > Carta’l Presidente del Gobiernu d’Asturies

Carta’l Presidente del Gobiernu d’Asturies

La carta que trascribimos debaxo unvióse tamién al máximu responsable del PSOE (Sr Rubalcaba) y al voceru d’educación del mesmu partíu nel Congresu de los Diputaos

Sr.  Presidente del Gobiernu del Principáu d’Asturies:

La Conseyería d’Educación, Cultura y Deporte  del Principáu d’Asturies quier facer ún de los mayores despropósitos en materia educativo vivíos nesta comunidá, siguiendo llamentablemente los pasos de la Conseyera d’Educación de Madrid, la tan criticada pol mesmu PSOE, Lucía Figar.
L’aberración que se-y ocurrió a la nuesa Conseyera Dª. Ana González afecta nuevamente al profesoráu interín asturianu, una más a añedir a unes polítiques de falta de negociación coles organizaciones sindicales, d’amortización de puestos y eliminación d’unidaes educatives qu’acaba de ser puesta en cuestión por tolos grupos políticos que conformen  la Xunta Xeneral del Principáu.
La convocatoria d’oposiciones pa esti cursu, refugada por SUATEA y el restu de sindicatos, llevaba amás un regalu envelenáu pa los docentes interinos: un cambéu nos criterios de formación de les llistes que va suponer el despidu pa centenares d’ellos si l’alcuerdu que propón la Conseyería se llegara a aplicar dacuando.
La propuesta contién una antoxana onde s’empondera’l trabayu del profesoráu interín. Pero esa afirmación vese compensada con una propuesta d’ellaboración de llistes que penaliza gravemente a les  persones que lleven años trabayando n’Asturies con resultaos reconocíos.
Salvo delles CCAA nes que les llistes de profesoráu interín tán zarraes y ordenaes por rigorosu orde d’antigüedá  (País Vascu, Isles Baleares, Cataluña, Andalucía y Galicia), los elementos qu’apurren puntuación pa tar incluyíos nes llistes tienen dos grandes apartaos na regulación que d’esta tema faen les distintes CCAA: l’antigüedá y la nota d’oposición. A ellos hai qu’añedir otros apartaos que suelen cuntar menos como la formación y otros méritos, que se suelen valorar conxuntamente na mayoría de CCAA, y el trabayar en puestos de mal desempeñu.
La distribución de les puntuaciones puede inclinar la balanza n’unu o otru sentíu. Pero a naide se-y escapa que’l desempeñar un puestu de trabayu per años apurre una cualificación p’acceder al empléu definitivamente en cualesquier ámbitu llaboral. L’antigüedá nel empléu interín ye por ello una componente esencial en tolos baremos p’acceder a les llistes d’interinos de tol Estáu, menos aquelles, como yá diximos arriba, nes que les sos llistes tán zarraes. Namás hai una comunidá na que la esperiencia docente ye fecha de menos: la comunidá de Madrid, onde se-y atribúi un porcentaxe risible del 15% y agora Asturies con un 35%. Otru puntu inalmisible ye la desixencia de llograr un 4 nel primer exame cada añu que se fagan oposiciones. Puede dase’l casu de qu’un docente que sacara una nota curiosa nun procesu selectivu anterior y inclusive pudiera sacar un 10 y tenga la mayor antigüedá (dende’l sentíu común esta persona sería un candidatu escelente por nota y por esperiencia) quede fuera de les llistes por tener un mal día y nun sacar un 4 nel primer exame de la última oposición. Otra vuelta vese la intención d’echar del sistema al profesoráu interín con antigüedá (el más caru por cobrar trienios y sexenios) yá qu’gnórase tanto la so esperiencia como la so nota d’oposición anterior pa sustituyilu por profesoráu ensin nenguna esperiencia, pero sustancialmente más baratu pa l’Alministración a la de contratalu.
La nuesa Conseyera sigue los pasos de Lucía Figar y dexa apostráu’l criteriu d’antigüedá a un míseru 35%, que namás puede sacase dempués de 22 años de servicios. Non solo sigue los pasos de la Conseyería más retrógrada nel  tratamientu del profesoráu interín y que provocó’l despidu de miles d’ellos, sinón qu’amás discrimina a quien nun se presentó a oposiciones, torga que s’utilicen les notes correspondientes a oposiciones anteriores al añu 2000 y a les sacaes cuando’l llamáu sistema del periodu transitoriu, un  procedimientu puestu en marcha ente los años 2006 y 2010 pol gobiernu del PSOE. Esta prohibición nun esiste en nengún otru llugar en tol Estáu.
La verdadera razón d’esti despropósitu ye fundamentalmente económica: tratar d’echar de les llistes d’interinos a quien tienen antigüedá y cobren trienios y sexenios (por imperativu llegal, yá que nun cobralo suponía incumplir la normativa europea antidiscriminatoria).  Una actitú indigna d’una Conseyería d’Educación que diz de forma hipócrita valorar a los sos docentes interinos.
Desiximos la retirada d’esti borrador por considerar qu’atenta contra los derechos de miles d’interinos asturianos y abandona cualesquier forma d’averase a la estabilidá nel empléu de les persones que güei tán incluyíes nes llistes asturianes, pos de perfacese esta reordenación Asturies convertiríase na comunidá autónoma que peor trataría al so profesoráu interín.
Atentamente,
El Secretariáu d’Asturies de SUATEA y delles firmes

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743