Home > Aición sindical > Campaña de SUATEA pola meyora de les condiciones llaborales del profesoráu

Campaña de SUATEA pola meyora de les condiciones llaborales del profesoráu

Meyores Llaborales PropuestesNa rueda de prensa entamada por SUATEA féxose pública la campaña “Pola escuela pública” col envís de denunciar la yá insostenible situación del profesoráu asturianu nos centros. Esta campaña, que yá se ta espardiendo pelos institutos y escueles, céntrase na meyora de les condiciones llaborares del personal, incluyendo ente otres reivindicaciones, la recuperación del poder alquisitivu, la reducción de la xornada y el refugu a la contratación de becarios con funciones docentes que meteríen la precariedá, nel términu más absolutu, ente los enseñantes.

La Conseyería d’Educación, pesie a les sos declaraciones grandones contra la Llei Wert lo que fai ye siguir metiendo recortes y, en cuantes a los currículos, aplicala de pe a pa. Por ello, consideramos qu’esti ye’l momentu de denunciar que siguir cola implantación de la nueva llei d’educación supondrá imponer, ensin debate social nin conocimientu con antelación abonda, una nueva organización nos centros que llevará a una reconversión de parte del profesoráu como consecuencia de la perda de la carga horaria pa munches especialidaes.

Consideramos qu’esti ye un momentu clave pa retomar les reivindicaciones docentes: de primeres enfrentámonos a un carráu de cambios col trabayu extra qu’ello implica cuando sábese que la LOMCE puede tener fecha de caducidá y sería un esfuerzu inútil; de segundes la cercanía de les elecciones autonómiques oblíganos a dexar clares les necesidaes urxentes del profesoráu y del propiu sistema educativu asturianu pa qu’éstes les recueyan les diferentes organizaciones polítiques ente los sos compromisos electorales. Nesi sentíu dende SUATEA solicitemos entrevistes colos principales partíos que se presentarán a les elecciones.

Creemos que ye importante la participación y el debate nos centros d’estes reivindicaciones que presentamos. La nuestra campaña va siguir cola celebración d’asamblees y l’unviu a los centros de propuestes de documentos pa que los claustros garren postura pidiendo la paralización de la implantación de la LOMCE. La primera asamblea va ser esti miércoles, nel IES Aramo d’Uviéu, a les 18:30 h.

La propuesta organizativa que la conseyería d’Educación pon enriba la mesa supondrá ente otres coses la desapaición d’unos 80 puestos de profesoráu técnicu de FP yá qu’elimínase l’Apoyu al área práctica, la reconversión d’abondos docentes d’especialidades de los que la so carga horaria disminuirá o sufrirán la obligatoriedá de tener un númberu mínimu pa constituyir grupu como por exemplu Segunda Llingua Estranxera, Filosofía, Tecnoloxíes, y de toles especialidaes optativas n’ESO (Música, Plástica, Cultura Clásica, Tecnoloxía, ente otres) .

Dende SUATEA dirixímonos pues a toles organizaciones esmolecíes pol enseñu públicu y al profesoráu asturianu pa dicir yá valió a esta situación que pon en peligru ún de los encontos de la nuestra sociedá.

ASAMBLEA DE PROFESORÁU
POLA PARALIZACIÓN DE LA IMPLANTACIÓN DE LA LOMCE
IES ARAMO 25 DE MARZU 18:30 HORES

Uviéu, 19 de marzu del 2015

Esta entrada tamién se puede consultar en: Castellanu