Campaña 18/23. Razones pa una protesta.

Esta entrada está disponible en: Castellano (Castellanu)

La enseñanza pública lleva yá 6 años de retayos acumulaos. A una situación, que nunca tuvo la oportunidá de ser bona, aplicáronse-y una delles polítiques d’axuste que camudaron sustancialmente el desenvolvimientu diariu nos centros educativos. Toles faltes que vive l’alumnáu de resultes del aumentu de la ratio, la desapaición de sofitos y desdobles, el zarru d’aules en zones rurales o la masificación de centros mientres esperen ampliaciones -por poner dellos exemplos- inciden directamente nel llabor del profesoráu.

Atender a la diversidá l’alumnáu precisa una práctica docente de calidá que nun puede dase menos profesionales con cada vez. Vívese una situación onde’l voluntarismu y el sobreesfuerzo suplen la necesaria inversión que tien de llevase a cabu pola Alministración.
Nos centros de Secundaria, ún de los retrocesos más importantes que se produxo nes condiciones llaborales del profesoráu ta directamente venceyáu col aumentu de la xornada llectiva. L’aplicación d’una norma estatal executóse n’Asturies de manera más gravosa que nel restu de CCAA, lo que, xunío a la falta de voluntá política per parte de la Conseyería d’Educación pa tomar midíes qu’echen atrás esta situación, fai aumentar el malestar y la tensión ente unos docentes que trabayen en peores condiciones que nel restu del Estáu Español.

Reivindicar la vuelta a les 18 hores ye namás una parte de les reivindicaciones del colectivu, pero quiciabes de les que meyores repercusiones tendría nel funcionamientu ordinariu de los centros. Amenorgar el periodu lectivu tien de resultes un ineludible aumentu de la plantiya educativa. Más profesoráu ye lo que dexaría retomar munches de les midíes d’atención a la diversidá que s’esaniciaron (desdobles, sofitos, grupos flexibles…), desenvolver los proyectos de centru con fondura, realizar les coordinaciones necesaries, volver retomar tutoríes desapaecíes, más disponibilidá pa la preparación de materiales, equipos y práctiques na FP, etc. Ye menester, más que nunca, que’l profesoráu amuese’l so refugu a siguir nesta situación de precariedá, d’agotamientu nel desenvolvimientu d’unes funciones cada vez más complexes, sobre les qu’aumenten les esixencies sociales y la burocracia. Nun ye bastante coles declaraciones nos medios, los escritos o la recoyida de firmes, llegó’l momentu de dir más allá, de facer una presión mediática qu’acabe cola inflexibilidad de la Conseyería énte les nueses demandes, esto consíguese saliendo a la cai y denunciando, saliendo nos medios y esplicando la realidá de la educación asturiana a la ciudadanía.

Los centros de Primaria nun tán al marxe d’esta situación, l’Alministración incumple unos alcuerdos qu’establecen la plantiya mínima necesaria pal correctu funcionamientu de les escueles. Ye necesario dar a conocer que n’Asturies s’axudiquen les necesidaes de personal aplicando criterios numbéricos que busquen cuadrar les hores disponibles como si los maestros y maestres fueren robots a programar. Los especialistes tienen de sirvir pa impartir cualquier materia, nun hai personal d’orientación anque se cumplan los esixentes requisitos que s’establecen nel Decretu onde se regula, aplíquense ratios de 20 alumnos pa AL y 12 pa PT que naide sabe d’ónde salen, nun hai disponibilidad pa facer sofitos, nun hai tiempu pa facer coordinaciones, les actividaes complementaries que salen p’alantre faense a cuenta de hores fora la xornada llaboral…

Cuando se reivindiquen 23 hores lectives en Primaria, nun se ta pidiendo trabayar menos, lo que se pide son más docentes nos centros, que les medies xornaes s’amplíen, qu’haya disponibilidad pa facer les actes necesaries, planes de trabayu individualizáu, informes pa les families sobro la evolución de los sos fíos y fíes y que puedan retomase midíes de refuerzu que dexen ameyorar académicamente a los neños y neñes que s’atienden. Reivindicar 23 hores lectives supón tamién dignificar les funciones del profesoráu de Primaria ya Infantil, que se dea importancia a la necesaria preparación de les clases, que nun se puede pidir que se seya innovador o que s’implementen metodoloxíes actives ensin facilitar tiempos pa la formación y puesta en práctica de manera coordinada de les mesmes. Precisamos más docentes nos centros y más hores pa toles xeres que dexen impartir clases coles resultancies que queremos. Too esto consíguese reivindicando y faciendo pública una demanda con un lema concretu qu’engloba munches soluciones.

Les 18 y 23 hores llectives son un compromisu cola calidá educativa, cola dignidá de los maestros y maestres, coles necesidaes del alumnáu, a última hora, cola escuela pública.

¡Hai que salir a esixir esi compromisu!

 

Uviéu, 26 de xineru de 2018

Print Friendly, PDF & Email

Esta entrada está disponible en: Castellano (Castellanu)