Home > Comunicaos > Calificaciones fin de curso del Conseyeru d’Educación

Calificaciones fin de curso del Conseyeru d’Educación

Tamos nun momento de balances, tamién nel ámbitu educativu. Nun ye cuestión determinada poles elecciones, anque les últimes declaraciones del Conseyeru d’Educación sí que paecen d’encargu, ye cuestión de valorar nesti momentu d’exámenes y reválides el resultáu del cursu no tocante a la política educativa.

Estrenábamos el branu pasáu un nuevu responsable qu’intervieno na Xunta Xeneral asoleyando un programa de gobiernu enllenu de promeses y bones intenciones que, en pasando’l tiempu, convirtióse en brindis al sol cuando non en fechos contrarios dafechu a lo anunciao.

Les crítiques a la LOMCE quedaron en  declaraciones “guapes” que resulten teatrales al venir acompañaes d’una aplicación obediente de la Llei que nos estrema de les demás CCAA comprometíes cola non aplicación

•              El diálogu y la rellación colos representantes del profesoráu: 

Aconceyase col Conseyeru foi llabor imposible pa SUATEA, la organización sindical mayoritaria. Sacante la presentación de primeros de cursu nun tuviemos posibilidá de nengún diálogu a pesar de ser un cursu enllenu d’elementos trescendentales pa la comunidá educativa. Esta situación ye estrapolable al nengunéu al que foi sometida la Xunta de Personal, que nun foi recibida tovía pa tratar les resoluciones aprobades nel  Plenu del segundu trimestre. Les informaciones llegaron primero pelos medios de comunicación que pela vía de l’Alministración. Nota final: Insuficiente

•              Profesoráu interín:

Na Xunta Xeneral aprobóse una Proposición non de Llei qu’afala a la Conseyería d’Educación a la negociación d’un nuevu Alcuerdu d’interinidá. Nun se tuvo en cuenta tovía  y les consecuencies llacerioses del alcuerdu actual, cola inestabilidá que trai pal colectivu, siguen igual. Por culpa de les nueves esixencies de titulaciones o la non almisión de correcciones na realización de las solicitúes pa participar nel procesu selectivu, delles persones van quedar escluyíes de les nueves llistes d’interinidá y por ello emburriaes al paru, en dalgún casu con 30 años de llabor docente enriba’l lombu. Falta de respetu y empatía tala colos profesionales que tán teniendo pol nuestru sistema educativu colos niveles de calidá que s’algamen nun pue llevar más qu’a otru suspensu pal Sr. Conseyeru.

•              Obres y mantenimientu de los centros educativos:

Terminamos un cursu enteru ensin tener avances significativos. Nun siendo l’aumentu de barracones, situación que se ta volviendo  habitual cuando nun tenía que ser más qu’un fechu escepcional, nun hubo nada nuevo. Anque siempre s’ampara na falta de presupuestu, la verdá ye que cuando yá había partíes empobinaes pa construcciones como l’IES de la Fresneda, por exemplu, tampoco se remataron les obres prometíes.  El diálogu cola comunidá educativa nesti asuntu ye nulu tal y como espeyen les movilizaciones de les families. Resultáu: Insuficiente.

•              Condiciones llaborales del profesoráu:

Tolos “piropos” que’l Sr. Conseyeru echa al profesoráu asturiano nos qu’empondera’l so trabayu nun se traducieron en nenguna meyora de les condiciones llaborales, que foren empeorando los últimos años cola aplicación de los recortes. Somos el profesoráu con mayor carga llectiva y permanencia más llarga nel centru de tol Estáu. Na nuestra Conseyería son impermeables a les peticiones de la Xunta de Personal y a les iniciatives d’otres CCAA qu’entamaron midíes concretes que meyoren les condiciones nes que desenvuelven  la docencia y polo tanto meyoren la calidá de la enseñanza. Tampoco se cumplieron los diferentes alcuerdos firmaos hai años coles OOSS, nun s’axudiquen especialistes de Primaria pa les tutoríes d’esa etapa, nun se recuperen los apoyos que se perdieron n’Infantil, el profesoráu itinerante sigue sin cobrar lo que-y  correspuende y nun hai visos de que la situación cambie pal cursu que vien… ¿Qué nota se-y pue poner? Insuficiente.

•              Retayos d’unidades n’Infantil:

Cola disminución de la tasa de natalidá les midíes foron clares; nada de baxar les ratios, nada d’aumentar los apoyos, nada qu’implique dar osíxenu  a la escuela pública pa poder recuperase de los güelpes de los últimos cursos. La respuesta foi quitar unidaes y cola siguiente perda de puestos de trabayu, paez que’l fechu de que sía profesoráu interín l’afectáu ye un mal menor ¿son trabayadores de segunda? Mientres, la escuela privada concertada sigue protexida. Sobre la apuesta clara en defensa de la escuela pública la nota nun pue ser otra qu’Insuficiente.

•              Sobre la llingua asturiana:

A pesar de les declaraciones en positivo y los compromisos verbales y escritos, la situación del enseñu del asturianu nun avanzó migaya. L’estáu de l’asignatura ye igual de precariu dafechu que cursos pasaos, col agravante del incumplimientou de lo recoyío nel Plan de Dignificación, que va un añu aprobó la Xunta Xeneral, y que’l mesmu Conseyeru asumió como oxetivu creando espectatives que se frustraron darréu. Nun hai nengún deber fechu. Nota final: Insuficiente.

•              Oposiciones:

Queda menos d’una selmana pa entamar les oposiciones d’esti añu. Cuando s’emite esti comunicáu nun se conoz la llista definitiva de persones almitíes.  El Sr. Conseyeru  enchípase tou de que se publicaren los criterios de calificación como si eso fuera por ello un gran llogru. Fai años que nes demás CCAA se publiquen toos esos datos xunto con especificaciones sobre les pruebas práctiques. Vamos a remolque, tarde, mal y nunca. Sobre los tribunales tampoco nun tán los criterioss de funcionamientu nada claros, ¿cuántes hores va trabayar el profesoráu si tien qu’atender los sos llabores docentes pela mañana y peles tardes exercer de miembros de tribunal? ¿Pueden imponese calendarios de duración de les correcciones ensin saber cuántes persones se van presentar al procesu? Tar con estes cuestiones a estes altures dexa muncho que desear d’un procesu inminente que tenía de tar cuantayá perfectamente rematáu. Nun llega tampoco el Sr. Conseyeru al aprobáu.

 

Uviéu, 14 de xunu de 2016

Esta entrada tamién se puede consultar en: Castellanu