Home > Muyer > Calandariu de muyer > Calendariu 2017: “Tiempu de Muyeres – Muyeres nel Tiempu”

Calendariu 2017: “Tiempu de Muyeres – Muyeres nel Tiempu”

CALENDARIU 2017: “TIEMPU DE MUYERES, MUYERES NEL TIEMPU”. CEADORES DE CAMBEOS SOCIALES

PRESENTACION CALENDARIO 2017La edición númberu 13 del calendariu “Tiempu de muyeres, muyeres nel tiempu” ta dedicada en 2017 a creadores de cambeos sociales. Nél recuéyese  les aportaciones de muyeres  que participaron o son parte de los movimientos sociales.

Faemos un percorríu por distintes lluches sociales: abolicionistes de la esclavitú, sufraxistes, pro derechos civiles, pacifistes, polítiques, pro derechos llaborales, activistes medioambientales, pro derechos sexuales y reproductivos, pro educación, defensa de la identidá sexual, contra la violencia machista y dalgunes de les sos representantes femenines más significatives.

Parte fundamental del calendariu son les actividaes didáctiques propuestes que s’atopen axeitaes per etapes: dende la educación infantil hasta la educación de persones adultes al traviés de distintos materiales, recursos y metodoloxíes.

Trátase d’un preséu que nos dexa trabayar na aula la visibilidá de les muyeres y la coeducación cualquier día del añu coles efemérides al traviés de 365 muyeres distintes y les sos aportaciones. Da pie a conocer y conmemorar fechos y díes que fueron especialmente significativos na llucha pola igualdá, el respetu a la diversidá sexual y la identidá de xéneru, y afala l’apreciu a la paz, la solidaridá, los derechos humanos, y el refugu a la violencia contra les muyeres.

Reconstruise, amás, la historia incompleta conocida y tresmitida tanto en llibros de testu, curriculum  educativu, pa, a partir d’ella, visibilizar ante’l profesoráu y l’alumnáu les aportaciones de les muyeres de tolos tiempos, aportaciones que fueron negaes y privaes de la reconocencia que merecen pol saber androcéntricu de la nuesa cultura.

Esti trabayu enmárcase na serie de trabayos que se realicen añalmente dende la Organización de Muyeres de la Confederación Intersindical a la que pertenez SUATEA. El calendariu añal ye, quiciabes, el más llamativu y visible. A él súmense les unidaes didáctiques del 25N y la revista El   Clarión monográficu  del 8 de marzu.

Nesti trabayu, recuéyense l’esfuerzu y el trabayu de toles muyeres de la Organización de Muyeres de la Confederación  Intersindical  na que participa la Secretaría de la Muyer de SUATEA. Nos próximos díes vamos empezar la so distribución, totalmente gratuita ,a los centros educativos.

Ye tiempu de muyeres, porque les muyeres tamos nel tiempu.

DESCARGA’L CALENDARIU N’ASTURIANU (Contién les actividaes didáctiques)

20 xineru 2017
Secretaria de la Muyer de SUATEA

Esta entrada tamién se puede consultar en: Castellanu