SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Por cuenta de les oposiciones d’Auxiliares Educadores convocaes para’l próximu miércoles, 30 de payares, pol Institutu Asturianu d’Alministración Pública “Adolfo Posada” (BOPA nº 92, de 5 d’ochobre de 2022), dende SUATEA queremos denunciar públicamente les repercusiones negatives nel alumnáu con necesidaes educatives especiales que va tener l’ausencia del personal temporal opositor mientres la xornada llectiva. Los opoyos efectuaos pol personal auxiliar son fundamentales pa llevar a cabu los desplazamientos nel centru, nes entraes y salíes, nel control d’esfínteres, llabores d’hixene, alimentación, ente otres. Con esta pésima planificación, l’alumnáu más vulnerable va quedar priváu d’una atención más personalizada. Nel momentu necesariu, les rutines van vese alteriaes por tiempos d’espera dilataos; tamién va afectar a la hixene y, poro, al estáu de confort necesariu pa centrar l’atención, participar nes situaciones d’aprendizaxe y evitar alteraciones. Esto ye, nun va poder asegurase l’atención integral nunes condiciones dignes, o ¿daquién puede pensar qu’un neñu o neña pueda tar ensin dir al bañu o ensin cambéu de pañal dende la entrada al colexu hasta que remate la so xornada escolar?
SUATEA denunció esti fechu desque tuvo constancia del mesmu, poniendo en conocencia de la Conseyería d’Educación los problemes que’l desenvolvimientu de les pruebes en día llectivu causaríen en munchos centros escolares que cunten con una única persona auxiliar, o nos centros d’Educación Especial que veríen la so plantiya absolutamente amenorgada, en dellos casos con ausencies de más del 80% de los sos efectivos.
Esiximos la coordinación y cooperación ente la Conseyería d’Educación y Función Pública pa tomar midíes urxentes de dotación de personal suplente qu’asegure la fayadiza atención del alumnáu mientres el personal auxiliar que tienen asignáu ta participando nel procesu selectivu del día 30 de payares pa estabilizar la so situación llaboral.
El Secretariáu de SUATEA
Uviéu 25 de payares de 2020
Esta entrada está disponible en: Castellano (Castellanu)
