Atención a la diversidá a coste 0

Esta entrada está disponible en: Castellano (Castellanu)

Güei, SUATEA caltuvo una xunta col Director Xeneral d’Ordenación, Evaluación y Equidá Educativa pa conocer cuála ye la posición de la nuesa Alministración educativa frente a la denuncia que la nuesa organización sindical-yos fíxo llegar el 23 de setiembre referida al cambéu de les condiciones de trabayu derivaes de la medría máxima d’alumnáu permitida nes Aules Abiertes ensin el consecuente aumentu de profesoráu y ensin nengún tipu de consulta o negociación previa coles organizaciones sindicales.
Les Aules Abiertes son un recursu de los colexos públicos concebíu pa la transición del alumnáu -principalmente con trestornos del espectru autista, del desenvolvimientu o dificultaes de comunicación- a l’aula ordinaria de referencia, hasta llegar a una escolarización completa nel so grupu d’iguales. Ye polo tanto una midida d’atención a la diversidá p’alumnáu con necesidaes educatives especiales. Dende SUATEA contactóse con
casi la totalidá de les 22 aules abiertes esistentes n’Asturies pa conocer de primera mano la situación de les mesmes y poder tresmitir al Director Xeneral, David Artime, les principales demandes:

  • Esixencia d’apautar en Mesa Sectorial d’Educación los cambios qu’afecten a les condiciones llaborales del profesoráu. Énte l’aumentu escepcional de la ratio, medría de profesoráu venceyáu a l’Aula Abierta ensin dependencia de fontes de financiamientu proveniente de fondos del FSE que nun aseguren la estabilidá del recursu. Tenemos de recordar a la nuesa Conseyería que SUATEA impugnó parcialmente la Circular d’entamu de cursu 2020/2021 pa los centros docentes públicos consiguiendo l’anulación de los criterios d’asignación del personal especialista de Pedagoxía Terapéutica (PT) y Audición y Llinguaxe (AL) al alumnáu con Necesidaes Educatives Especiales (NEE). Demanda estimada por considerar que la Circular suponía un efectivu de cambéu de les condiciones de trabayu d’estes maestres ensin mediar negociación colectiva, frayando con ella l’artículu 37.1 del testu refundíu del Estatutu Básicu del Emplegáu Públicu.
  • Evaluación seria y rigorosa de les Aules Abiertes per parte de la Conseyería pa qu’atienda a la diversidá de situaciones y se pueda meyorar tanto’l procedimientu como les dotaciones en función de les necesidaes de caúna d’elles. Fai ver SUATEA que les Aules Abiertes tienen de cuntar con dos especialistes a tiempu completu naquelles aules qu’algamen la llende de la ratio (5 alumnos y/o alumnes) y, en concencia, cuando esista la escepcionalidá de ratio 6.
  • Asignación abondo dende l’entamu de cursu d’Auxiliares d’Educación (AE) pa garantizar una atención fayadiza al alumnáu, tanto de les Aules Abiertes (qu’anguaño entá nun cunten col personal solicitáu),como de los Centros d’Educación Especial (CEE) cuando, por situaciones derivaes d’escolarización combinada, una auxiliar educadora se desplace al centru ordinariu, dexando al CEE ensin el sofitu que davezu empresta al restu los alumnos y alumnes asignaos, menguando la cantidá del sofitu y, poro, la so calidá.


Por too ello, SUATEA esixe a la Conseyería d’Educación que regule les midíes necesaries p’asitiar les bases d’una escuela realmente inclusiva y perdurable, con una dotación presupuestaria afayadiza en cuenta d’a costu cero y la consiguiente sobrecarga llaboral del profesoráu.

Martes, 4 d’ochobre de 2022
Secretariáu de SUATEA

Print Friendly, PDF & Email

Esta entrada está disponible en: Castellano (Castellanu)