Home > Comunicaos > Asturies y la crisis eterna ¿Agora la Escuela Pública?

Asturies y la crisis eterna ¿Agora la Escuela Pública?

SUATEA aporfía na supresión de los conciertos educativos.

Falar de crisis ye un tema recurrente n’Asturies (minería, siderurxa, naval, demografía, mundu rural, etc.)  Güei la prensa señala lo que podría ser l’entamu d’otra crisis, la qu’afeuta a la Escuela Pública asturiana. N’efectu, les informaciones referíes a la fase de preinscripción pal próximu cursu 2019-2020, señalen que solo na contorna d’Avilés, la escuela concertada llevaría, de confirmase los datos, un 45% del alumnáu de nueva incorporación na etapa d’Infantil.

Consideramos el tema como un asuntu d’evidente gravedá yá qu’esti datu significa que, de cara al próximu cursu, del total de places ufiertaes pola Escuela Pública, solo van llegar a cubrise la metá de les mesmes, empecipiándose d’esta miente una fonda crisis nel sector educativu públicu.

SUATEA siempres se manifestó a favor de la supresión de los conciertos educativos (empezando pelos centros de localidaes nes qu’hai ufierta pública abonda) señalando que la Escuela Pública debería de funcionar como una rede única capaz de garantizar una enseñanza universal, igualitaria, inclusiva, laica y y de calidá pal conxuntu de la población escolarizada. Esta defensa de la Escuela Pública ye pa SUATEA una de les sos exes centrales, si non el principal, de la so intervención cotidiana. Ye por esto qu’esti plantegamientu apaez recoyíu en tola nuesa documentación, dende los Programes electorales, intervenciones en Conseyos Escolares, etc. Precisamente va pocos díes aldericóse esti mesmu asuntu nel Conseyu Escolar del Principáu (CEPA) a cuenta de les propuestes de meyora presentaes pol nuesu sindicatu.

Tamos énte un ciclu electoral nel que se van tomar decisiones sobre temes bien importantes, siendo una d’elles la reversión de los retayos pa volver a garantizar que la Escuela Pública cumpla en condiciones coles funciones que la sociedá mos encamienta al personal docente. Amás de los nuesos contactos colos equipos directivos de los centros de la zona d’Avilés y contorna, SUATEA va apellar a los candidatos de les estremaes fuerces electorales, municipales y autonómiques, pa que se pronuncien al respective de los conciertos educativos y les midíes necesaries a adoptar pa garantizar que la Escuela Pública pueda desenvolver la so actividá nes meyores condiciones. Siempres defendimos que la educación de los nuesos menores nun puede ser un negociu.

Asturies ta sobrada de crisis y nun precisa amontala añediendo nuevos sectores. Entendemos que na nuesa comunidá, el futuru de la educación pasa pol reforzamientu de la rede pública, garantizando los recursos necesarios pa una ufierta universal y de calidá tanto a nivel humanu como material.

Uviéu, 6 de mayu de 2019

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344