Wert abandona’l barcu ensin ser a aplicar la LOMCE. SUATEA pide la paralización de la llei

Esta entrada está disponible en: Castellano (Castellanu)

WERT ABANDONA’L BARCU ENSIN SER A APLICAR LA LOMCE
SUATEA PIDE LA PARALIZACIÓN DE LA NUEVA LLEI

Les presiones exercíes dende la comunidá educativa escontra les polítiques aplicaes por Wert toparon la so respuesta cola dimisión encubierta del ministru pior valoráu del Gobiernu.

Depués d’un cursu demandando’l so cese, col refugu de tolos sectores de la educación énte imposiciones como la xuba de tases universitaries, el recorte de beques o’l llamáu 3+2, fuimos a ver que dieron frutu criando una crisis política nel PP a pocu tiempu de les elecciones xenerales. Dende la perspectiva del profesoráu, el pasu de Wert pel ministeriu supunxo: l’aumentu de les hores llectives, del númberu d’alumnos y la disminución de la plantiya, too ello aplicao con rixu pola nuestra Conseyera Ana González, que mos llevó a unes tases d’interinidá inaceptables, al aumentu de les medies xornaes y una situación de sobresfuerzu xeneralizáu que mina la posibilidá de mantener la calidá educativa que toos y toes queremos.

Nonostante, la normativa más trascendente y agresiva qu’esti ministro fexo escontra la educación pública ye la LOMCE, llei qu’algamó la unanimidá de sindicatos de profesoráu, asociaciones d’estudiantes y confederaciones de les families nes protestes y movilizaciones, fuelga incluyida. En plenu procesu d’aplicación d’esta llei, que supón un retrocesu de décades, poniendo en peligru l’accesu a la titulación n’ESO d’aquel alumnáu que s’empobine a los Programes de Meyora del Aprendimientu y el Rendimientu, o’l camín ensin salida nin posibilidá de retornu p’aquellos que se deriven a la FP Básica, dende’l Conseyu Escolar del Principáu solicitóse, por unanimidá, la moratoria per un cursu escolar.

Amparándose nesa declaración de la comunidá educativa y aprovechando esti momentu en que’l titular del Ministeriu abandona’l barcu, en plenu proceso d’aplicación de la nueva llei, la Conseyería d’educación debería dar un pasu alantre, desixir esa moratoria y nun proceder a implantala’l próximu cursu.

Dende SUATEA pensamos que la priesa cola que se quier aplicar el calandariu LOMCE, la dificultá organizativa qu’ello implica pa los centros docentes y les consecuencies que conlleva sobre profesoráu y alumnáu son motivos abondos pa desixir la paralización de la mesma.

Uviéu, 20 de mayu del 2015

Print Friendly, PDF & Email

Esta entrada está disponible en: Castellano (Castellanu)