SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El MEC va reformar la universidá pa potenciar la so privatización, pa encarecela, y pa torgar l’accesu y la movilidá del profesoráu universitariu.
El Conseyu de Ministros acaba d’aprebar el so últimu ataque al enseñu públicu en forma de reforma universitaria.
Con esta aprebación, ensin dar tiempu a la implementación y evaluación de los diferentes estudios de grau impuestos pola aplicación del denostáu Plan Boloña, el ministeriu quier mediante’l “proyectu de Rial Decretu pol que se modifica’l RD 1393/2007, pol que s’establez la ordenación de les enseñantes universitaries oficiales y el RD 99/2011, pol que se regulen les enseñantes oficiales de doctoráu” modificar los estudios de Grau (cuatro años y 240 créditos) y de Máster (un añu y 60 créditos), permitiendo que les universidaes cambien al so antoyu la duración de graos y máster, implantando graos de tres años y máster de dos. L’oxetivu ye claru: encarecer los estudios universitarios, ya que los fielatos de les matricules de los máster son abondo más elevaos que los de los graos. Esta midía, a la qu’hai que xuncir la disminución del númberu y cuantía de les beques, paez destinada claramente a endurecer l’accesu a la universidá por cuestiones económiques; expúlsase claramente de la universidad a les fíes y fíos de les familias que nun son a pagar estos precios desorbitaos.
L’actividá docente sigui infravalorada nel “proyectu de Rial Decretu pol que se modifica’l RD 1312/2007, pol que s’establez l’acreditación nacional pal accesu a los cuerpos docentes universitarios”, pues los nuevos procedimientos d’evaluación de los méritos y competencies dirigíos a algamar l’acreditación necesaria p’acceder a los cuerpos docentes universitarios son menos claros y imparciales que los actuales, endureciendo los requisitos que faciliten l’accesu y la movilidá del profesoráu universitariu, permitiendo valorar el trabayu externu a la universidá cuando los méritos de docencia y investigación sean insuficientes.
SUATEA entiende que la defensa de la universidá pública pasa por lluchar contra la implantación d’estos riales decretos, pues la so aplicación va contribuyir al esmantelamientu progresivu de la universidá pública nel que tá embarcáu l’actual gobiernu col ministru Wert como punta de llanza. Nos postreros cuatro años menguó la inversión universitaria en más de 1.500 millones d’euros; les plantiyes menguaron en más d’ocho mil persones (ente Profesoráu y PAS) por despidu, por xubilación y pol mantenimientu de la tasa de reposición d’efectivos nel 10%; xubieron los fielatos, en delles comunidaes más del 50%, y disminuyeron les beques del MEC nun 15%; l’alumnáu matricúlase en menos créditos, y el cursu pasáu hebo 45.000 estudiantes universitarios menos que l’anterior (d’ésti inda nun hai datos).
Ye necesario también recuperar la inversión na educación superior, acabar cola tasa de reposición, aumentar el númberu de beques y menguar los fielatos pa permitir que pueda accedese a la universidá pública en función de los méritos y conocimientos, y non de la disponibilidá económica de les familias.
SUATEA opondráse con toles sos fuercies a esta nueva agresión a la escuela pública y fae un llamáu a tola sociedá pa que refugue esta política educativa que como la LOMCE solo beneficia a los enemigos del enseñu públicu.
Esta entrada está disponible en: Castellano (Castellanu)
