SUATEA xunto con otres fuerces sindicales esixe a la Conseyería d’Educación una solución a les obres d’ampliación de Les Campes

Esta entrada está disponible en: Castellano (Castellanu)

Les Campes. concentración sindicatosLos sindicatos SUATEA, FETE-UGT, ANPE y CCOO aconceyaron esta mañana cola Conseyería d’Educación pa denunciar la falta d’información y treslladar el malestar y la inquietú de docentes y families del C.P. Juan Rodríguez Muñoz de Les Campes.

Los representantes de los trabayadores espunxeron a l’Alministración les sos demandes no que cinca a la seguridá de los trabayadores del enseñu que desarrollen la so actividá nesa escuela d’Uviéu, asina como la de les families con escolares matriculaos nella.

Los sindicatos solicitaron a los responsables de la Conseyería que s’igüen los problemes xeneraos pola mala xestión y l’ocultamientu d’información qu’acabó xenerando les protestes de la comunidá educativa, una obra d’estes dimensiones y característiques supón un riesgu pa toles partes implicaes. L’Alministración nun cumplió cola so obligación d’informar a los representates sindicales en tiempu y forma, por ello pidieron nel Rexistru Xeneral que se-yos entregue’l Plan de Seguridá.

Durante los últimos años la Conseyería lleva desenvolviendo esti tipu d’obres colos centros a plena actividá, suponiendo ello un altu riegu d’accidente. Yá lo vimos durante’l postreru cursu académicu col aumentu d’un pisu nel IES de La Corredoria, y repítese agora col CP Juan Rodríguez Muñoz. Hasta’l momento nun hebo que llamentar nenguna mancadura, pero nun se puede consentir qu’esti tipu d’actuaciones irresponsables se xeneralicen tal y como plantega l’Alministración nes obres de Les Campes, o nes planificaes nel CP Ruiz Tilve.

Asina mesmo dende SUATEA queremos denunciar les presiones que se vienen exerciendo sobre’l conxuntu de trabayadores y de families. Ye mezquino y mui poco empático amenazar a les families que nun tán llevando los sos neños y neñes a les aules o que pidieron el tresladu de matrícula, cola intervención de Servicios Sociales, con nun evaluar pola non asistencia y con nun poder nun futuru volver al centru escolar una vez rematen les obres.

SUATEA quier solidarízase colos trabayadores y coles families, y asume les sos reivindicaciones como xustes. Por ello va seguir faciendo tolo que tea na so mano pa facer que la Conseyería modifique la so actitú y busque salides amañoses pa toles partes implicaes.

SUATEA entiende que conceder el tresllau de centru tal y como fexo esta selmana a delles families, alegando causes sobreveníes, ye un reconocimientu implícitu de la propia Conseyería de les deficiencies de la so actuación. Esta situación actual nun resuelve’l conflictu xeneráu, sinon que va facer qu’aumente algamando unes dimensiones imprevisibles a la vuelta de les vacaciones d’iviernu. La Conseyería, promoviendo esta actuación, ta diciéndo-yos al restu de families y trabayadores qu’esiste un riesgu rial, dando la razón a les primeres demandes y ensin ufiertar una solución definitiva que satisfaga a toles partes implicaes.

Print Friendly, PDF & Email

Esta entrada está disponible en: Castellano (Castellanu)