SUATEA desixe definición de la Conseyería sobre la ufierta pública d’empléu

Esta entrada está disponible en: Castellano (Castellanu)

Tando yá a lo primero del añu 2015, SUATEA entiende que ye inaceptable la permanente indefinición de la Conseyería d’Educación sobre la ufierta pública d’empléu prevista pa esti añu. Teniendo en cuenta que la gran mayoría de les comunidaes autónomes yá fexeron públiques les sos intenciones -en dellos casos dende la seronda- anunciando la naturaleza de la ufierta –primaria, secundaria o FP-, el númberu de places y les especialidaes peles que se convoquen, ye mui revesoso d’entender que’l gobiernu asturianu tovía nun definiera les característiques de la ufierta prevista. Si otros años la sida pa nun lo facer yera que tovía nun taben aprobaos los presupuestos, esti añu d’alcuerdu presupuestariu PSOE-PP invalida esi argumentu de forma clara, polo que yá tien que tar presupuestada la ufierta en base a unos criterios definíos que, estrañamente, la Conseyería nun quier anunciar.

Como tolos años, los opositores asturianos ven otra vez como avanza’l cursu y nun tienen tovía claro siquiera si va haber convocatoria y de qué, cola zozobra qu’eso supón pal colectivu. Dende SUATEA desiximos un pronunciamientu claru y definíu de la Conseyería, qu’incluya la convocatoria de toles places vacantes y que sirva pa estabilizar l’empléu nel colectivu docente.

Print Friendly, PDF & Email

Esta entrada está disponible en: Castellano (Castellanu)