Nuevu asesinatu d’un defensor de los derechos humanos en Colombia

Dende SUATEA queremos facer la denuncia pública pol asesinatu en Colombia del defensor de derechos humanos, activista cívicu y profesor Carlos Alberto Pedraza Salcedo.
El 19 de xineru Carlos Pedraza coló dende’l so domiciliu pal llugar de Teusaquillo onde diba tener una xunta relacionada cola comercializadora Agropecuaria El Zipa, siendo esi el caberu día que se comunicó con miembros de la so familia.
El miércoles 21 de xineru del 2015 sobre les 9 de la mañana miembros de la Policía Xudicial topen el cuerpo ensin vida de Carlos Pedraza nun sector despobláu de la vereda San Bartolomé. El cálabre presentaba signos de violencia na cabeza que posiblemente fueron la causa de la so muerte.
Desgraciadamente, los asesinatos de dirixentes sindicales y de los y les defensores de los derechos humanos siguen impunes en Colombia.

Énte estos fechos, desiximos al estáu colombianu:

Adelantar les investigaciones y acciones llegales necesaries pa determinar los responsables intelectuales y materiales de los fechos.

Garantíes pal exerciciu del trabayu social y políticu que faen les organizaciones sociales, polítiques y populares del país.

Llamamos:

A la opinión pública nacional y internacional, a los Organismos de protección y defensa de los Derechos Humanos y del Derechu Internacional Humanitariu, a toles organizaciones y persones a pronunciase solidariamente énte estos fechos y se-y desixa al estáu colombianu dar respuesta efectiva a esti y al restu de los crímenes que siguen impunes.

Uviéu 23 de xineru del 2015