Estratexes en materia de salú escolar

Estratexes en materia de salú escolar: otro despropósitu de la Conseyería d’Educación cola collaboración de la Conseyería de Sanidá

Les Conseyeríes d’Educación y Sanidá alcordaron una serie de estratexes respecto a la salú escolar qu’espublizaron al traviés d’una resolución conxunta de les dos conseyeríes y qu’aborden temes mui importantes na vida escolar.

La salú del nuestru alumnáu ye un esmolecimientu constante nos centros educativos. La falta de personal en tolos ámbitos, particularmente’l sanitariu y l’educativu tamién lo ye.

D’un tiempu p’acá asistimos a un intentu de que seya’l profesoráu de los centros públicos los qu’asumamos toa una recatafila de xeres que deberíen facer otros profesionales de diversos ámbitos.

En munchos países de la nuestra redolada, como ye’l casu francés, el personal que trabaya nun centru educativu dobla en númberu al de trabayadores nun institutu o escuela pública n’Asturies. Nun institutu públicu con un númberu d’alumnos o alumnes asemeyáu a los nuestros IES, esti ye’l personal col que cunten:

Y referímonos únicamente al personal de xestión ensin carga docente, non al profesoráu nin al personal llaboral ocupáu en múltiples xeres dende la reprografía a la llimpieza pasando pel personal de cocina o ayudantes de llaboratoriu y que dependen de los mentaos equí enriba.

Pero nel casu de nuestru gobiernu  preténdese que seya’l profesoráu quien s’ocupe de tola xera imaxinable nos centros educativos. Y nesta Resolución conxunta de les dos conseyeríes esto ye lo que se pretende. Siguir engordando la llista de llabores a mandar a los docentes mientres miles de persones siguen nel paru y bona parte de la nuestra reciella y mocedá ta nuna situación de indefensión más propia del sieglu XIX. La malnutrición instálase ente la nuestra mocedá procedente de families azotaes pola crisis ensin que los poderes públicos muevan un déu pa palialo. Los comedores escolares con cocineres y cocineros sustituyéronlos en munchos de los centros onde tovía se manteníen por servicios de catering, esto ye, de comides cocinaes con hores d’antelación y servíes por persones con contratos perprecarios.

En cuenta de plantegar la vuelta a los comedores escolares con cocines onde se garanticen menús de calidá y cocinaos con productos locales por profesionales cercanos que conozan al alumnáu, síguese mareando con estratexes que nun ponen en cuestión l’actual sistema.

El gobiernu reconoz les carencies qu’en materia de salú presenta’l sistema actual. Pero en cuenta d’adoptar soluciones razonables pero con costu, opta por sobrecargar a los docentes obviando la necesaria criación de puestos venceyaos al sector mélicu, d’enfermería, d’asistentes sociales, ente otros, que deberíen formar parte de les plantiyes de los centros educativos.

Ye totalmente irracional, como se pretende con esta resolución, dexar en manes de persones que carecen de formación xera rellacionada cola salú de la nuestra reciella y mocedá. Puen producise situaciones que la pongan en pelligru precisamente. La Conseyería pretende suplantar la formación que recibe’l personal sanitariu con unos cursinos pal profesoráu insuficientes dafechu colos que la Conseyería pretende cubrise les espaldes envede asumir la so propia responsabilidá.

Les midíes conteníes na resolución mentnada en nengún momentu se negociaron na Mesa Sectorial d’Educación nin s’informó d’elles a la Xunta de Personal Docente. El fartuque ente’l profesoráu medra nesti final de cursu, caracterizáu poles ocurrencies y pol despreciu qu’esta conseyería amuesa hacia’l so personal docente.